لاہور۔21مارچ(اے پی پی ) صوبائی وزیر اطلاعات و ثقافت صمصام علی بخاری نے کہا ہے کہ ہم نواز شریف کی بیماری پر سیاست کرنے پر یقین نہیں رکھتے ، حکومت نے نواز شریف کو جیل میں زیادہ سے زیادہ سہولیات فراہم کرنے کی پالیسی اختیار کر رکھی ہے۔ میڈیا سے گفتگو کرتے ہوئے صوبائی وزیر نے کہا کہ مریم نواز ٹویٹ کرتی ہیں کہ نواز شریف سے ملنے کی کسی کو اجازت نہیں دی جا رہی۔ یہ امر خلاف حقیت ہے، حکومت نے کسی کو ملاقات سے نہیں روکا، جمعرات کے روز جس کا دل کرے وہ نواز شریف سے ملاقات کر لے، حکومت کو کوئی اعتراض نہیں۔ انہوں نے کہا کہ جہاں تک نواز شریف کے لندن جانے کا سوال ہے تو اس کا فیصلہ عدالت نے کرنا ہے۔ اگر عدالت ان کو اجازت دیتی ہے تو حکومت کسی قسم کی رکاوٹ نہیں ڈالے گی ۔یہ خالصتاً عدالتی اختیار ہے، حکومت کا اس معاملے میں کو عمل دخل نہیں ۔ ایک سوال کے جواب میں صوبائی وزیر اطلاعات نے کہا کہ اُنہیں بلاول بھٹو کے بیان پر سخت مایوسی ہوئی ہے۔ اُنہوں نے کہا کہ مجھے دکھ ہوا کہ شہید بےنظیر بھٹو کا بیٹا وہی زبان بول رہا ہے جو بھارتی میڈیا اور بھارتی حکمران پاکستان کے بارے میں استعمال کرتے ہیں۔
