اسلام آباد۔21ستمبر (اے پی پی):وفاقی وزیر برائے منصوبہ بندی، ترقی،اصلاحات وخصوصی اقدامات اسدعمر نے کہا ہے کہ حکومت ملک میں22- 2021 کے دوران صحت کے شعبے کی بہتری پر73.9 ارب روپے خرچ کر رہی ہے،صحت کے بجٹ کے گزشتہ سالوں کے مقابلے میں موجودہ سال میں 410 فیصد زیادہ ہے، یہ گزشتہ تین سالوں میں صحت پر کل خرچ کی تین گنا ہے۔ان خیالات کا اظہار انہوں نے منگل کو ایک اعلیٰ سطحی جائزہ اجلاس سے خطاب کرتے ہوئے کیا۔
اسد عمر نے نئی اور جاری صحت کی سکیموں کا تفصیلی جائزہ لیا جنہیں موجودہ اور پچھلے مالی سال میں وفاقی مالی امداد سے پورا کیا جارہا ہے۔ انہوں نے کہا کہ وبائی بحران کا سامنا کرتے ہوئے حکومت نے نہ صرف بجٹ کی تقسیم میں صحت کا تحفظ کیا ہے بلکہ صحت کی اسکیموں کے ذریعے صحت کے مضبوط نظام ، وبائی امراض کی تیاری اور عالمی صحت کی کوریج سمیت اہم اور اسٹریٹجک منصوبوں کو اولین ترجیحات میں شامل کیا۔
انہوں نے کہا کہ رواں مالی سال کے پی ایس ڈی پی 2021-2022 میں ، 40 نئی اور جاری سکیموں کے لئے وزارت نیشنل ہیلتھ سروسز ، ریگولیشن ، اور کوآرڈینیشن کے لئے21.7 بلین روپے مختص کئے گئے ہیں جو کہ گزشتہ سال وزارت کے لیے مختص بجٹ سے 50 فیصد زیادہ ہے، اس کے علاوہ ، فنانس ڈویژن کے تحت صحت کے منصوبوں کے لئے 2 ارب روپے ، کشمیر امور اور گلگت بلتستان کے تحت صحت کے منصوبوں کے لئے 4.4 ارب روپے ، اور پاکستان اٹامک انرجی کمیشن کے تحت صحت کے منصوبوں کے لیے 2.8 ارب روپے مختص کئے گئے ہیں۔
اجلاس کو بتایا گیا کہ راولپنڈی میں سینٹر آف ایکسلینس فار گائناکالوجی اینڈ اوسٹیٹریکس کا قیام ، پمز اسلام آباد میں ایک جدید ترین حادثات اور ایمرجنسی سنٹر ، پمز کے نیورولوجی اور نیفرولوجی ڈیپارٹمنٹس کی اپ گریڈیشن ،سکردو میں 200 بستروں پر مشتمل پولی کلینک ہسپتال کا قیام ، گلگت میں میڈیکل اینڈ نرسنگ کالج اور کارڈیک ہسپتال ، آزاد کشمیر ، کراچی ، بہاولپور اور لاہور میں اٹامک انرجی کمیشن ہسپتالوں کی اپ گریڈیشن شامل ہیں۔
ممبر سوشل سیکٹر ڈاکٹر شبنم سرفراز نے اس بات پر روشنی ڈالی کہ ان منصوبوں کے اندر ، پانچ صوبائی منصوبوں کے لیے 3.6 ارب روپے رکھے گئے ہیں۔ کووڈ- 19 پی سی ون کے تحت صوبوں کو مالی سال 2021-2022 میں 37.96 ارب روپے کا بھی تفصیلی جائزہ لیا۔ مجموعی طور پر پاکستان بھر میں 152 صحت کی سہولیات کو اپ گریڈ کیا جا رہا ہے تاکہ اپ ڈیٹ تشخیصی ، متعدی اور اہم نگہداشت کی انتظامی صلاحیتوں کے حامل لوگوں کو صحت کی بہترین سہولیات فراہم کی جاسکے۔
