اسلام آباد۔28دسمبر (اے پی پی):وزیر خارجہ مخدوم شاہ محمود قریشی نےکہا ہے کہ پاکستان، برطانیہ کے ساتھ دو طرفہ اقتصادی، تجارتی و سیاسی تعلقات کو مزید مستحکم بنانے کیلئے پر عزم ہے۔یہ بات انہوں نے برطانوی ہاوس آف لارڈز کے رکن "لارڈ ڈینیئل ہینن سے گفتگو کرتے ہوئے کہی جنہوں نے بدھ کو وزارتِ خارجہ میں ان سے ملاقات کی۔ ملاقات کے دوران پاکستان اور برطانیہ کے درمیان دو طرفہ تعلقات، باہمی دلچسپی کے شعبوں میں تعاون کے فروغ سمیت مختلف امور پر تبادلہ خیال کیا گیا۔
وزیر خارجہ نے کہا کہ پاکستان اور برطانیہ کے درمیان گہرے، کثیرالجہتی دو طرفہ مراسم ہیں۔ پاکستان، برطانیہ کے ساتھ دو طرفہ اقتصادی، تجارتی و سیاسی تعلقات کو مزید مستحکم بنانے کیلئے پر عزم ہے۔انہوں نے کہا کہ پاکستان اور برطانیہ کے درمیان اسٹرٹیجک شراکت داری معاہدے سے دو طرفہ تجارتی و اقتصادی تعلقات، مزید وسعت پذیر ہوئے ہیں،برطانیہ میں مقیم 16 لاکھ پاکستانیوں کی موجودگی ، دو طرفہ تعلقات کے استحکام کا مظہر ہے۔
شاہ محمود قریشی نے کہا کہ ہم پاکستان اور برطانیہ کے درمیان سفارتی تعلقات کی 75ویں سالگِرہ کو بھرپور انداز میں منانے کا ارادہ رکھتے ہیں، مجھے اپنے حالیہ دورہ ءبرطانیہ کے دوران برطانوی وزیر خارجہ لز ٹرس سمیت برطانیہ کی اہم سیاسی شخصیات سے ملاقات کا موقع ملا۔
دورہء برطانیہ کے دوران میری برطانوی پارلیمنٹ کی فارن ریلیشنز اور ڈیفنس کمیٹیوں کے سربراہان کے ساتھ بھی خصوصی نشستیں ہوئیں۔لارڈ ڈینیئل ہینن، نے وزیر خارجہ شاہ محمود قریشی کے حالیہ دورہ برطانیہ اور برطانوی سیاسی شخصیات کے ساتھ ہونیوالی ملاقاتوں کو سراہا۔
