اسلام آباد۔14جولائی (اے پی پی):وفاقی وزیر خزانہ مفتاح اسماعیل نے کہا ہے کہ وزیراعظم شہباز شریف کی قیادت میں دن رات محنت کرکے آئی ایم ایف سے ایک اچھا معاہدہ طے کرنے میں کامیاب ہوئے،آئی ایم ایف نے ہماری ’’سستا پٹرول سستا ڈیزل‘‘ سکیم کو اور بے نظیر انکم سپورٹ پروگرام اور اتحادی حکومت کی غریب دوست پالیسیوں کو سراہا ہے۔
جمعرات کو آ ئی ایم ایف کی طرف سے پروگرام بحالی کے حوالے سے جاری بیان میں انہوں نے کہا کہ عوام کے لئے خوش خبری اور مبارک ہو،اللہ تعالیٰ کا شکر ادا کرتے ہیں کہ آئی ایم ایف کے ساتھ پاکستان کا معاہدہ طے پاگیا ہے،قوم کو مبارک دیتا ہوں ،وزیراعظم شہباز شریف کی قیادت میں دن رات محنت کرکے آئی ایم ایف سے ایک اچھا معاہدہ طے کرنے میں کامیاب ہوئے۔
انہوں نے کہا کہ آئی ایم ایف نے تسلیم کیا ہے کہ گزشتہ سال کے تاخیری اقدامات کی وجہ سے وجہ سے بہت زیادہ بجٹ خسارے ہوئے ،آئی ایم ایف نے مانا ہے کہ گزشتہ سال بجلی کے شعبے میں بدانتظامی اور تاخیری اقدامات کی وجہ سے گردشی قرض میں 800 ارب روپے کا اضافہ ہوا ۔
انہوں نے کہاکہ ثابت ہوا کہ ٹیم اہل ہو، اس کی نیت صاف اور ارادے پختہ ہوں تو کارکردگی اور عوام کی خدمت میں بہتری آ سکتی ہے ،ہم زیادہ ٹیکس جمع کریں گے، اور زیادہ محنت کریں گے اور عوام کو مزید آسانیاں دینے کے لئے کوشاں ہوں گے ،شدید معاشی مشکلات کے باوجود ہم نے عوام دوست بجٹ دیا، عوام کو ریلیف دیا،ہم نے امیر طبقات پر بوجھ ڈالا ہے ۔
انہوں نے کہاکہ آئی ایم ایف نے ہماری ‘سستا پٹرول سستا ڈیزل’ سکیم کو اور بے نظیر انکم سپورٹ پروگرام اور اتحادی حکومت کی غریب دوست پالیسیوں کو سراہا ہے،وزیراعظم شہباز شریف کی قیادت میں اتحادی حکومت نے ملک وقوم کے مفاد میں پٹرول اور ڈیزل کی قیمتوں میں اضافے کے مشکل فیصلے کئے ہیں ،وزیراعظم شہباز شریف اور اتحادی حکومت میں شامل تمام جماعتوں کے قائدین اور رہنماؤں کو بھی مبارک دیتا ہوں اور ان کے جذبے اور خلوص کو سراہتا ہوں ۔
انہوں نے کہاکہ اللہ تعالیٰ کی مہربانی سے عالمی منڈی میں تیل کی قیمتیں کم ہو رہی ہیں۔مشکل حالات میں مشکل فیصلے کرنے پڑے، آئی ایم ایف سے معاہدہ طے پانے کے بعد اتحادی حکومت کا ہر فیصلہ عوام کی زندگیوں میں آسانی لانے کی راہ ہموار کرے گا ۔
انہوں نے کہا کہ عوام کے لئے ریلیف کا وقت آگیا ہے، پٹرول، ڈیزل سمیت دیگر چیزوں میں ریلیف کی فراہمی کی راہ ہموار ہوگئی ہے، عمران خان نے چار سال خاص طور پر آخری چھ ماہ میں جو بارودی سرنگیں بچھائی تھیں، بڑی حد تک ان کے اثرات سے ملک اور عوام کو بچا لیا ہے ،تین ماہ میں دن رات کی انتھک مسلسل محنت اور وزیر اعظم شہباز شریف کی رہنمائی میں یہاں تک پہنچے ہیں ۔
انہوں نے کہاکہ عمران خان اور ان کے ساتھی مسلسل جھوٹ بولتے رہے لیکن اللہ تعالیٰ نے ہماری مدد فرمائی۔جنوری فروری میں عمران خان نے آئی ایم ایف سے کئے معاہدے توڑ کر پاکستان کو سری لنکا بنانے کی کوشش کی، اللہ تعالیٰ نے پاکستان کو بچا لیا ۔آج سری لنکا میں 470 روپے لیٹر تیل ہونے کے باوجود عوام کو دستیاب نہیں، عمران خان پاکستان میں یہی کچھ کرانا چاہتے تھے عمران خان کی پاکستان کو معاشی دیوالیہ کرانے کی سازش ناکام ہوگئی ہے ۔
انہوں نے کہا کہ مشکل فیصلے کئے، بحیثیت قوم ہم سب نے مشکل حالات کا سامنا کیا لیکن اس کے نتیجے میں پاکستان واپس معاشی تسلسل اور استحکام کی راہ پر واپس آگیا ہے، یہ اللہ تعالیٰ کی مہربانی ہے،قوم نے جو مثالی تعاون کیا، اس پر سلام پیش کرتا ہوں ،آج پاکستان بجلی، تیل سب دستیاب ہے، 7 ہزار میگاواٹ بند بجلی کے کارخانے بحال کر دئیے ہیں
،آج الحمد اللہ ملک میں لوڈ شیڈنگ نہیں، زندگی پھر سے معمول کی طرف واپس آ رہی ہے ،پاکستان کو معاشی دیوالیہ پن سے بچانا پہلی بڑی کامیابی ہے، اب پاکستان کو معاشی ترقی کی طرف لے کر جائیں گے جو ہماری دوسری بڑی کامیابی ہوگی، پاکستان کو تعمیر، ترقی اور خوشحالی کی منزل سے ہمکنار کریں گے۔
