پشاور۔3اگست (اے پی پی):وزیراعظم کے مشیر برائے سیاسی و عوامی امور انجینئر امیر مقام نے کہا کہ سابق وزیراعظم عمران خان الیکشن کمیشن کے فیصلے کے بعد سیاست جاری رکھنے کی اخلاقی بنیاد کھو چکے ہیں۔ انہوں نے کہا کہ ای سی پی کے فیصلے میں قرار دیا گیا ہے کہ پاکستان تحریک انصاف کو حریف ممالک سمیت ممنوعہ ذرائع سے بھاری غیر ملکی فنڈنگ حاصل ہوئی ہے جو کہ ملکی آئین کی صریح خلاف ورزی ہے۔
بدھ کے روز ڈی آئی خان اور خیبرپختونخوا کے جنوبی اضلاع کے سیلاب متاثرین سے پشاور میں گفتگو کرتے ہوئے انجینئر امیر مقام نے کہا کہ ای سی پی کے فیصلے کے بعد عمران خان مصدقہ جھوٹے ثابت ہوئے اور ان کے لیے مزید پی ٹی آئی چیئرمین رہنے کا کوئی جواز نہیں۔ انہوں نے کہا کہ عمران خان امریکا اور دیگر ممالک سے فنڈنگ لینے کے بعد عوام کو دھوکہ دینے کے لیے امریکا مخالف بیانیہ تیار کررہے ہیں،
انہوں نے مزید کہا کہ ای سی پی کے فیصلے کے بعد پاکستان کے عوام جانتے ہیں کہ کون جھوٹا ثابت ہوا اور کس نے غیر قانونی غیر ملکی فنڈز سیاسی فائدے کے لیے استعمال کیے۔ مقام نے دعویٰ کیا کہ اب یہ واضح ہو گیا ہے کہ عمران نے ملک کو غیر مستحکم کرنے اور چین پاکستان اقتصادی راہداری پر پیشرفت کو روکنے کے لیے غیر قانونی غیر ملکی فنڈنگ کے ذریعے پاکستان میں سیاست کی۔
انہوں نے کہا کہ عمران خان نے اداروں اور اس کی قیادت پر کیچڑ اچھالنے کے لیے بیرون ملک سے اربوں روپے وصول کیے، ای سی پی کے فیصلے سے ثابت ہوا کہ عمران خان صادق اور امین نہیں رہے، انہوں نے کہا کہ عمران حکومت کی ناقص معاشی اور مالیاتی پالیسیوں نے ملک کو مہنگائی اور لوڈ شیڈنگ میں دھکیل دیا ہے۔
انہوں نے کہا کہ پی ایم ایل این ملک کو دیوالیہ ہونے سے بچانے کے لیے مخلوط حکومت میں شامل ہوئی تھی۔مقام نے کہا کہ ای سی پی کے فیصلے کے بعد عمران خان اب لوگوں سے منہ چھپا رہے ہیں اور آرٹیکل 62 اور 63 کے تحت ان کی نااہلی اب قریب ہے۔انہوں نے کہا کہ وفاقی حکومت مشکل کی اس گھڑی میں سیلاب متاثرین کے ساتھ کھڑی ہے اور آخری متاثرین کی بحالی تک کوششیں جاری رکھے گی۔مقام نے کہا کہ وزیر اعظم شہباز شریف سیلاب سے متاثرہ بلوچستان کا دورہ کر چکے ہیں اور پہلے ہی کے پی سمیت ملک بھر کے سیلاب متاثرین کے لیے معاوضے کا اعلان کر چکے ہیں۔
انہوں نے کہا کہ موٹروے اور انڈس ہائی وے خیبرپختونخوا کے جنوبی اضلاع کے لوگوں کے لیے مسلم لیگ ن کی حکومت کا تحفہ ہے۔ انہوں نے کہا کہ ان منصوبوں سے پشاور اسلام آباد اور ڈی آئی خان کے درمیان فاصلہ کم ہو جائے گا۔وزیراعظم کے معاون نے کہا کہ ٹانک، لکی مروت، وزیرستان اور دیگر ملحقہ اضلاع کے لوگ ان میگا پراجیکٹس سے بڑے پیمانے پر مستفید ہوں گے اور کے پی میں خوشحالی کے نئے دور کا آغاز ہوگا۔
