اسلام آباد۔4ستمبر (اے پی پی):جاپان نے جناح انٹرنیشنل ایئرپورٹ کراچی پر ہنگامی امدادی سامان جو خیموں اور پلاسٹک کی شیٹس پر مشتمل ہے نیشنل ڈیزاسٹر مینجمنٹ اتھارٹی ( این ڈی ایم اے) کے حوالے کر دیا ہے۔
اتوار کو جاری ہونے والے ایک بیان میں کہا گیا کہ جاپان انٹرنیشنل کووآپریشن ایجنسی ( جے آئی سی اے)پاکستان آفس چیف نمائندہ کنوشیتا یاسمیتسو اور کراچی میں جاپان کے قونصل جنرل اوداگیری توشیو اس موقع پر موجود تھے۔29 اگست کو جاپان نے پاکستان کی درخواست پر یہ سامان جے آئی سی اےکے ذریعے فراہم کرنے کا فیصلہ کیاتھا۔
سامان کی پہلی کھیپ اس سے قبل 31 اگست کو حوالے کی گئی تھی جوبلوچستان میں تقسیم کی گئی۔جاپان کے قونصل جنرل اوداگیری توشیو نے کہا کہ جاپان کو پاکستان میں سیلاب سے بڑے پیمانے پر ہونے والے نقصان پر بہت دکھ ہوا ہے، جس نے 2010 کے تباہ کن سیلاب کو بھی پیچھے چھوڑ دیا ہے اور امید ظاہر کی کہ یہ سامان متاثرین کی مدد کرے گا۔
انہوں نے بتایا کہ متاثرہ علاقوں میں خوراک، پانی اور ادویات کی بہت زیادہ مانگ ہے اور اقوام متحدہ نے امداد کی اپیل جاری کی ہےاس لیے جاپان پاکستان کے ساتھ مل کر کام کرتا رہے گا اور جاپانی سفارت خانہ، قونصلیٹ جنرل اور جے آئی سی اےایک دوسرے کے ساتھ تعاون کریں گے۔پاکستان آفس کی چیف نمائندہ کنوشیتا یاسمیتسو نے غمزدہ خاندانوں کے ساتھ اپنی دلی تعزیت کا اظہار کیا جنہوں نے اپنے پیاروں کو کھو دیا ہے۔ انہوں نے کہا کہ جاپان نے ماضی میں بھی مختلف آفات کا سامنا کیا ہے۔ اس مشکل وقت میں پورا جے آئی سی اے فیملی آپ کے ساتھ ہے۔
انہوں نے کہا کہ جے آئی سی اے کی شراکت داری سےپاکستان نے اپنا پہلا ڈیزاسٹر مینجمنٹ پلان سال 2012 میں تیار کیا، جو اس وقت اگلے 10 سالوں کے لیے نظرثانی کے عمل میں ہے۔انہوں نے کہا کہ جاپان پاکستان کی امداد، بحالی اور بحالی کی کوششوں میں معاونت کے لیے پرعزم ہے۔
انہوں نے اس تباہی پر قابو پانے کے لیے این ڈی ایم اےکی لگن اور شراکت کے لیے اپنے دلی احترام کا بھی ذکر کیا۔این ڈی ایم اے کے نمائندے محمد معظم زمان نے آفت سے متاثرہ مختلف علاقوں کی صورتحال اور پاکستانی حکومت کی جانب سے جاری امدادی سرگرمیوں کے بارے میں بتایا اور کہا کہ وہ جاپان کی امداد کے شکر گزار ہیں اور اس بات کو یقینی بنائیں گے کہ امدادی سامان متاثرین تک پہنچایا جائے۔
