اسلام آباد۔15اکتوبر (اے پی پی):وفاقی وزیر برائے موسمیاتی تبدیلی سینیٹر شیری رحمان نے کہا ہے کہ ہماری دیہی خواتین ملک کی ترقی اور معیشت میں برابر کی شراکت دار ہیں،دیہی خواتین کے عالمی دن کے موقع پر پاکستان سمیت دنیا بھر کی دیہی خواتین کو خراج تحسین پیش کرتی ہوں۔
ہفتہ کو دیہی خواتین کے عالمی دن کے حوالے سے اپنے بیان میں شیری رحمان نے کہا کہ پاکستان کی کل آبادی کا 49 فیصد حصہ عورتوں پر مشتمل ہے جس میں دیہی خواتین کی تعداد 7 کروڑ 14 لاکھ سے زائد ہے،ہماری دیہی خواتین ملک کی ترقی اور معیشت میں برابر کی شراکت دار ہیں،سیلاب کی وجہ سے ہماری بہادر دیہی خواتین سب سے زیادہ متاثر ہوئی ہیں، سیلاب سے سب زیادہ متاثر آبادی کا 70 فیصد عورتوں اور بچوں پر مشتمل ہے۔
شیری رحمان نے کہا کہ بارشوں اور سیلاب کی وجہ سے 345 خواتین جاں بحق اور 3452 زخمی ہوئی ہیں،ماحولیاتی تبدیلی کے اثرات کی وجہ سے بھی سب سے زیادہ ہماری دیہی خواتین متاثر ہوتی ہیں،ہمیں تعلیم کے ساتھ دیہی خواتین کو ماحولیاتی تبدیلیوں کے حوالے سے آگاہی اور زراعت کے جدید طریقوں کی معلومات بھی فراہم کرنی ہے۔شیری رحمان نے کہا کہ دیہی خواتین کی ترقی میں ملک کی ترقی ہے۔
