اسلام آباد۔8نومبر (اے پی پی):وزارت توانائی (پٹرولیم ڈویژن )کے ترجمان نے ملک میں پٹرول اور ڈیزل کی قلت کے حوالہ سے خبروں کو بے بنیاد قرار دیتے ہوئے کہا ہے کہ ملک میں پٹرول اور ڈیزل کا وافر ذخیرہ موجود ہے، ایک اور کارگو 12 نومبر کو کراچی پہنچنے کا امکان ہے، آئل مارکیٹنگ کمپنیوں کے کارگوز بھی جلد پہنچ جائیں گے۔
منگل کو ایک بیان میں ترجمان نے کہا کہ پٹرول اور ڈیزل کی قلت کے حوالہ سے خبریں بے بنیاد اور حقائق کے منافی ہیں۔ 7 نومبر کو پٹرول کا ذخیرہ تقریباً 550,000 میٹرک ٹن تھا جو 21 دنوں کے لئے کافی ہے اور ڈیزل کے حوالے سے موجودہ سٹاک 438,000 میٹرک ٹن ہے جو آئل کمپنیز ایڈوائزری کونسل کے سٹاک پوزیشن کی بنیاد پر 15 دنوں کے لئے کافی ہے ۔
ترجمان نے کہا کہ نومبر 2022 کے لئے پی ایس او کی جانب سے ڈیزل کی درآمد کی منصوبہ بندی 220,000 میٹرک ٹن ہے جس میں سے ایک کارگو 12 نومبر کو کراچی پہنچنے کی توقع ہے جبکہ دیگر آئل مارکیٹنگ کمپنیوں کے کارگوز بھی جلد پہنچ جائیں گے ۔ترجمان نے کہا کہ ملک میں پٹرول اور ڈیزل کا ذخیرہ موجودہ ضروریات کو پورا کرنے کیلئے کافی ہے۔
