اسلام آباد۔16جنوری (اے پی پی):وفاقی وزیرداخلہ رانا ثناءاللہ خاں نے سابق صدر سپریم کورٹ بار ایسوسی ایشن عبدالطیف آفریدی کے قتل کی شدید مذمت کرتے ہوئے کہا ہے کہ خیبرپختونخوا لاقانونیت کا شکار ہے، امن وامان کی صورتحال الارمنگ ہے ،خیبرپختونخوا حکومت سیاسی جوڑ توڑ کے بجائے امن وامان پر توجہ دیتی تو یہ صورتحال نہ ہوتی ۔
پیر کواپنے بیان میں انہوں نے کہا کہ لالہ عبدالطیف آفریدی کے لرزہ خیز قتل کی جتنی مذمت کی جائے ، کم ہے ، پشاور ہائی کورٹ بارکے اندریہ واقعہ ہونا امن وامان کی سنگینی کا ثبوت ہے ۔ انہوں نے کہا کہ بہیمانہ جرم کا ارتکاب کرنے والوں کو قانون کے مطابق سخت ترین سزا دی جائے ، ایک دن میں راولپنڈی اور پشاور میں دو وکیلوں کو نشانہ بنایاگیا، دونوں جگہ پی ٹی آئی کی حکومت ہے ۔
انہوں نے کہا کہ وفاقی حکومت خیبر پختونخوا اور پنجاب دونوں کو امن و امان کی صورتحال بہتر بنانے کےلئے پہلے بھی متعدد مرتبہ آگاہ کر چکی ہے ۔ انہوں نے کہا کہ لالہ عبدالطیف آفریدی آئین ، جمہوریت اور مظلوم انسانوں کے وکیل تھے ،بہادری اور جرات سے سچ بولنا ان کا شیوہ اور تعارف رہا ،اللہ تعالی مرحوم کو اپنے جوار رحمت میں بلند درجہ عطا فرمائے اور اہل خانہ کو صبرعطا کرے۔ آمین
