کراچی۔20جولائی (اے پی پی):ریاست جونا گڑھ کے نواب محمد جہانگیر خانجی کراچی میں انتقال کر گئے ہیں۔کشمیرمیڈیاسروس کے مطابق نواب محمد جہانگیر سرطان میں مبتلا تھے اور گزشتہ چند دنوں سے ہسپتال میں زیر علاج تھے، انکی عمر67سال تھی، ان کی نماز جنازہ (کل )بعد از نماز جمعہ جونا گڑھ ہائوس کراچی میں ادا کی جائے گی۔
ریاستوں اور سرحدی علاقوں کی وزارت نے صاحبزادہ محمد جہانگیر خانجی کے انتقال پر گہرے دکھ اورکا اظہار کیا ہے۔ نواب آف جونا گڑھ کی وفات پر سیاسی، سماجی اور علمی شخصیات نے افسوس کا اظہار کرتے ہوئے ان کی وفات کو ملک اور ان کے خاندان کیلئے بڑا نقصان قرار دیتے ہوئے کہا کہ محمد جہانگیر خانجی نے اپنی ساری زندگی جونا گڑھ ریاست کی آزادی کیلئے وقف کررکھی تھی اوروہ اپنا ریاستی حق حاصل کرنے کیلئے کوشاں رہے۔
واضح رہے کہ نواب جہانگیر خانجی کے دادا نواب مہابت خان نے ریاست جوناگڑھ کے حکمران کی حیثیت سے 15ستمبر 1947کو پاکستان سے الحاق کی دستاویز پر دستخط کیے تھے۔نواب جہانگیر خانجی نے جوناگڑھ کی بھارتی تسلط سے آزادی کے مسئلے کو تمام بین الاقوامی فورموں پر اجاگر کیا۔
Short Link: https://urdu.app.com.pk/urdu/?p=375301
