فیصل آباد ۔ 20 اگست (اے پی پی):نگران وزیر اعلیٰ پنجاب محسن نقوی نے کہا کہ بیس لاکھ روپے کے امدادی چیک 72گھنٹے میں سانحہ جڑانوالہ کے متاثرین کے پاس ہونگے۔ اتوار کو جڑانوالہ میں امن کمیٹی کے اجلاس میں شرکت کے بعد میڈیا سے گفتگو کرتے ہوئے انہوں نے کہا کہ آج ہم نے چرچ میں کیبنٹ میٹنگ کی ہے اور اس اجلاس میں متفقہ طور پر طے پایا کہ سانحہ جڑانوالہ میں مسیحی برادری کے جو گھر جلے اور تباہ ہوئے ہیں ان کے رہائشیوں کو بیس بیس لاکھ روپے امداد مہیا کی جائے گی اور امدادی رقوم کے یہ چیک اگلے 72گھنٹے میں متاثرین کے پاس ہوں گے۔
انہوں نے کہا کہ ابھی میری امن کمیٹی کے ساتھ ملاقات ہوئی ہے جس میں ہمارے مذہبی رہنماؤں نے بہت اچھا پیغام دیا ہے۔ انہوں نے کہا ہے کہ اگر مسیحی بھائیوں کے پاس عبادت کرنے کیلئے جگہ نہیں ہے تو ان کیلئے ہماری مساجد کھلی ہیں وہاں پر آکر وہ اپنی عبادت کرسکتے ہیں۔وزیر اعلیٰ نے کہا کہ میرے خیال میں امن کمیٹی نے ایک بہت اچھا میسج دیا ہے۔ انہوں نے کہا کہ جڑانوالہ کا واقعہ ایک بہت بڑا سانحہ ہے۔
ہم اس مشکل وقت میں اپنے مسیحی بھائیوں کے ساتھ کھڑے ہیں اور امن کمیٹی اس سانحہ کے برے اثرات کو پیار اور محبت کے ساتھ دور کرے گی۔ انہوں نے کہا کہ امن کمیٹی نے مسیحیوں کا ساتھ دینے کااعلان کیا تھا اور اب وہ اپنے مسیحی بھائیوں کے ساتھ کھڑی ہے۔وزیر اعلیٰ نے کہا کہ جب تک ہر ایک متاثرہ خاندان کو امدادی رقوم کے چیک نہیں مل جاتے اور مسیحی برادری کے سارے چرچز ٹھیک نہیں ہوجاتے میں جڑانوالہ آتا رہوں گا۔
انہوں نے کہا کہ چرچز کی بحالی کا کام گزشتہ دوپہر کو شروع کیا گیاتھا اور اب تک دو چزچز بحال ہوچکے ہیں جن میں سے ایک کا وزٹ تو میں خود کیا ہے جبکہ باقی چرچز کی بحالی کا کام جاری ہے۔ انہوں نے کہا کہ کچھ چرچز میں کام وہاں کی انتظامیہ نے خود رکوایا ہے۔ وہ وہاں کی ڈیزائننگ میں کچھ تبدیلی اور بہتری لانا چاہتے ہیں۔
بہر حال حکومت کی طرف سے تمام مشینری ہروقت یہاں دستیاب رہے گی اور حکومت چرچز کی بحالی کا کام اپنے اخراجات سے کروائے گی۔ اس سوال کے جواب میں انہوں نے کہا کہ حکومت یہ بات پہلے ہی واضح کرچکی ہے کہ سانحہ جڑانوالہ میں ملوث افراد کو ضرور سزا ملے گی۔ کسی گناہگار کو ہرگز نہیں چھوڑا جائے گا، تاہم جو بے گناہ ثابت ہوئے انہیں ضرور ریلیف دیا جائے گا۔
Short Link: https://urdu.app.com.pk/urdu/?p=380950
