ڈیرہ اسماعیل خان ۔ 30 اگست (اے پی پی):نوتعینات ریجنل پولیس آفیسر ناصر محمود ستی نے کہا ہے کہ دہشتگردی کے ناسور کے خاتمے اور مختلف مسالک کے اکابرین کے د رمیان مذہبی ہم آہنگی کو مزید فروغ دیا جائےگا، محکمہ پولیس کےلئے بدنامی کا باعث بننے والی پولیس کی کالی بھیڑوں کو نشان عبرت بنائیں گے، محکمہ پولیس کےلئے نیک نامی کا باعث بننے والے پولیس اہلکاروں کو انعامات سے نوازا جائےگا ، پولیس اور عوام کے درمیان خوشگوار روابط کو آگے بڑھایا جائےگا۔
ان خیالات کا اظہار انہوں نے اپنے دفتر میں میڈیا کے نمائندوں سے گفتگو کے دوران کیا ۔ا نہوں نے کہا کہ ان کی کوشش ہوگی کہ پولیس کرائم کو کنٹرول کرے، دہشتگردی کےخلاف جنگ میں پولیس کے کردار کو مزید فعل بنایا جائے ، دہشتگرد ملک و قوم کے خیر خواہ نہیں ، دہشتگردی پر قابو پائینگے ، پولیس کی ویلفیئر انکی ترجیحات میں شامل ہے ،جدید ٹیکنالوجی کے ذریعے آئی ٹی بیسڈ کو زیادہ سے زیادہ متعارف کرایا جائےگا، ٹریفک کے نظام کو بہتر بنائیں گے، سمگلنگ کو روکیں گے۔
آرپی او ناصر محمود ستی کا کہنا تھا کہ جنوبی وزیرستان میں پولیسنگ کے نظام میں بہتری لانے کےلئے پولیس اہلکاروں کی تربیت پر خصوصی توجہ دینگے ، ان کا مزید کہنا تھا کہ نئے حالات ، کرائم کے لحاظ سے اور آبادی کو مد نظر رکھتے ہوئے تھانہ جات کی تعداد میں اضافہ کیا جائےگا۔
Short Link: https://urdu.app.com.pk/urdu/?p=384324
