کوئٹہ۔ 24 نومبر (اے پی پی):وزارت توانائی(پاور ڈویژن) کی خصوصی ہدایات پرکوئٹہ الیکٹرک سپلائی کمپنی(کیسکو)کی نادہندگان کے خلاف خصوصی مہم صوبہ کے تمام آپریشن سرکل میں تیزی سے جاری ہے جس میں کیسکونے خاطرخواہ کامیابی حاصل کی ہے اوراِس خصوصی مہم کے دوران کیسکونے صوبہ بھرمیں اب تک تقریباً94ہزار200 نادہندہ صارفین سے بجلی بلوں کے بقایاجات کی مدمیں ایک ارب76کروڑ50لاکھ روپے سے زائد رقم وصول کر لی ہے،جن میں گھریلو، کمرشل اور دیگر نادہندگان شامل ہیں۔
اس کے علاوہ جاری مہم میں کیسکونے اب تک صوبہ بھر کے تمام آپریشن سرکلز میں 1108بجلی چوروں کیخلاف قانونی کارروائی کیلئے مختلف تھانوں میں درخواستیں دائر کی ہیں جس میں سے 424 بجلی چوروں کے خلاف متعلقہ تھانوں میں ایف آئی آرزبھی رجسٹرڈ ہو چکی ہیں۔علاوہ ازیں بجلی چوروں کوڈیٹیکشن کی مدمیں 60 لاکھ8ہزاربجلی یونٹس جرمانہ کی مدمیں چارج کئے گئے ہیں جن میں سے اب تک26کروڑ35 لاکھ 95ہزارروپے وصول بھی کئے جاچکے ہیں۔
واضح رہے کہ وزارت توانائی (پاور ڈویژن) کے احکامات پر کیسکوکی ٹیمیں بجلی چوروں اورنادہندگان کے خلاف صوبہ بھرمیں بلاتفریق کارروائیاں کررہی ہیں، اس لئے کیسکو اپنے تمام صارفین سے اپیل کرتی ہے کہ وہ بجلی بلوں کی ادائیگی کے ساتھ ساتھ اپنے بقایاجات بھی اداکرتے جائیں اور بجلی کے غیر قانونی استعمال سے گریزکریں نیزبجلی چوروں کے خلاف اس قومی مہم میں کیسکوکا ساتھ دیں۔
Short Link: https://urdu.app.com.pk/urdu/?p=413878
