پشاور۔ 01 دسمبر (اے پی پی):خیبرپختونخواکے مختلف اضلاع میں ایک ہفتے کے دوران آپریشنل موضع جات میں 30 موضع جات کا اضافہ ہوا ہے جس سے مجموعی طو رپر آپریشنل موضع جات کی تعداد 2386 ہو گئی ہے۔بورڈ آف ریونیوخیبرپختونخوا حکام کے مطابق اسی طرح ایک ہفتے میں مینوئل موضع جات کی تعداد 813 سے کم ہو کر 474 رہ گئی ہے۔
گزشتہ 11 دنوں میں بنوں کے 10 ، ایبٹ آباد6 ، چارسدہ 7 ، پشاور3 ، بٹگرام 3 اور سوات اور شانگلہ کے ایک ایک موضع جات لائیو کر دیئے گئے ہیں جبکہ اسی عرصے میں ہری پور کے 15 ،سوات10 ، شانگلہ 11 ،بنوں44 ،پشاور15 ، ڈی آئی خان159 اور بٹگرام کے 7 موضع جات کے مینوئل انتقالات بند کر دیئے گئے ہیں۔بورڈ آف ریونیوخیبرپختونخوا حکام کے مطابق لینڈ ریکارڈ کی کمپیوٹرائزیشن کم سے کم عرصے میں مکمل کرنے کےلئے تمام اضلاع کے ڈپٹی کمشنرز کےلئے اہداف مقرر کر دیئے گئے ہیں جبکہ روزانہ کی بنیاد پر پیشرفت کا جائزہ لینے کےلئے پی ایم آر یو کے پورٹل پر لینڈ ریکارڈ کمپیوٹرائزیشن ٹریکنگ سسٹم تیار کر لیا گیا ہے۔
بورڈ آف ریونیو کی ٹیموں نے مختلف اضلاع بشمول کوہاٹ، پشاور، چارسدہ، لکی مروت، ڈی آئی خان اور ٹانک کے اچانک دورے کئے ہیں۔بورڈ آف ریونیوخیبرپختونخوا حکام کے مطابق اچانک دوروں کے دوران مختلف اضلاع میں تعینات ریونیو افسران اوراہلکاروں کو ناقص کارکردگی اور سرکاری امور کی انجام دہی میں غفلت برتنے پر معطل کیا گیا ہے اور ان کے خلاف انکوائریاں شروع کی گئی ہیں۔
بورڈ آف ریونیوخیبرپختونخوا حکام کے مطابق تمام ڈپٹی کمشنرز کو لینڈ ریکارڈ اور ریکارڈ روم کی حفاظت کےلئے پیشگی اقدامات کی بھی ہدایت کی گئی ہے اور ان سے ریکارڈ روم کےلئے آگ بجھانے والے آلات، الیکٹریفکیشن ، ریکنگ ، سی سی ٹی وی کیمروں کی تنصیب سے متعلق معلومات طلب کر لی گئی ہیں تاکہ درکار فنڈز فراہم کئے جائیں
Short Link: https://urdu.app.com.pk/urdu/?p=415524
