لاہور۔6دسمبر (اے پی پی):نگران وزیراعلی ٰپنجاب محسن نقوی نے چولستان کے بے زمین کاشتکاروں کےلئے تاریخ ساز اقدام کیا ہے،ان کی ہدایت پر45سال سے کاشتکاروں کو اراضی کی الاٹمنٹ کا رکا ہوا کام چند ماہ میں مکمل کرلیا گیا اور 27ہزار کاشتکاروں کو3لاکھ 44ہزار ایکڑ اراضی شفاف قرعہ اندازی کے ذریعے الاٹ کر دی گئی ۔ چولستان کے کاشتکاروں کو اراضی کی الاٹمنٹ کے لئے وزیر اعلیٰ آفس میں کمپیوٹرائزڈ قرعہ اندازی کا انعقاد کیا گیا۔وزیراعلیٰ محسن نقوی نے چولستان کے کاشتکاروں کو اراضی کی الاٹمنٹ کےلئے بٹن دبا کر کمپیوٹرائزڈ قرعہ اندازی کاآغاز کیا۔
تقریب سے خطاب کرتے ہوئے وزیر اعلیٰ محسن نقوی نے کہا کہ 27ہزار کاشتکاروں کو ساڑھے 12ایکڑ فی کس اراضی 5سال کی لیز پر دی جائے گی،45برس بعد جنوبی پنجاب کے 3 اضلاع رحیم یار خان، بہاولنگر او ربہاولپور کے غریب کاشتکار وں کو ان کاحق دیا ہے۔انہوں نے کہا کہ آج کا دن بہاولپور ڈویژن اورچولستان کے باسیوں کے لئے بہت اہم اور یاد گا ردن ہے، بہاولپور، رحیم یارخان او ربہاولنگر کے بے زمین کاشتکاروں کو قرعہ اندازی کے ذریعے اراضی کی الاٹمنٹ کی مبارکباد دیتا ہوں۔ان کا کہنا تھا کہ وہ جلد چولستان آ کرقرعہ اندازی میں کامیاب کاشتکاروں کو الاٹمنٹ کے کاغذات دیں گے، ساڑھے 12ایکڑ اراضی چولستان کے 27 ہزار کاشتکارو ں کوملے گی۔
انہوں نے کہا کہ کاشتکاروں کو اراضی کی الاٹمنٹ کے پورے عمل کو انتہائی شفاف بنایا گیا ہے ا و رانتہائی سخت سکروٹنی ہوئی ہے جس میں سیشن ججز اور سرکاری حکام سمیت تمام متعلقہ لوگ شامل تھے۔ محسن نقوی نے کہا کہ 1978سے چولستان کے لوگوں کے لئے اراضی کی الاٹمنٹ کا عمل زیرالتوا تھا جو آج مکمل ہوگیاہے ،اس سے چولستان کے ہزاروں خاندانوں کو روز گار میسر ہوگا، انشا اللہ اب چولستان کے پورے علاقے میں کاشتکاری ہوگی،ویران زمین سرسبز و شاداب ہوگی اور نہری پانی بھی میسرہوگا۔
وزیر اعلیٰ نے کہا کہ اراضی کی الاٹمنٹ کے لئے بہت معمولی ریٹ رکھے گئے ہیں، کاشتکار اس زمین کو اگلی فصل میں کاشت کریں گے۔ وزیر اعلیٰ کو بریفنگ میں بتایا گیا کہ سکروٹنی کے بعد 41841درخواست دہندگان شارٹ لسٹ کئے گئے۔بہاولنگر، رحیم یارخان او ربہاولپور کے اضلاع میں 27ہزار افراد کوساڑھے 12ایکڑ اراضی کی ایک ایک ا لاٹمنٹ5سال کی لیز پر دی جائے گی۔ صوبائی وزرا عامر میر، اظفر علی ناصر،چیف سیکرٹری زاہد اختر زمان اور سینئر ممبر بورڈ آف ریونیو نبیل جاوید نے بھی کمپیوٹرائزڈ قرعہ اندازی کی۔
کمشنر بہاولپور ڈویژن، ممبر کالونیز بورڈ آف ریونیو، ایم ڈی چولستان ڈویلپمنٹ ا تھارٹی، ڈی جی پنجاب انفارمیشن ٹیکنالوجی بورڈ، سیکرٹری نجکاری بورڈآف ریونیو، ممبر آئی ٹی بورڈ آف ریونیو اور متعلقہ حکام بھی اس موقع پر موجود تھے جبکہ ڈپٹی کمشنر بہاولپور ویڈیولنک کے ذریعے قرعہ اندازی کی تقریب میں شریک ہوئے۔
Short Link: https://urdu.app.com.pk/urdu/?p=417272
