کراچی۔ 09 دسمبر (اے پی پی):گورنر سندھ کامران خان ٹیسوری نےکہا ہے کہ انسانی حقوق کی پاسداری ہر ریاست کی بنیادی ذمہ داری ہے،رنگ و نسل و مذہب کی تفریق کے بغیر انسانی حقوق کی فراہمی سے ہی معاشرہ ترقی کرسکتا ہے۔
گورنر ہاؤس سے جاری اعلامیہ کے مطابق انسانی حقوق کے عالمی دن کے موقع پر اپنے پیغام میں گورنر سندھ نے کہا کہ بابائے قوم محمد علی جناح ؒ نے پاکستان کے ہر شہری کے حقوق کے تحفظ کی بات کی۔انہوں نے کہا کہ اقوام متحدہ کے انسانی حقوق کے چارٹر پر عملدرآمد ہر ملک کی اولین ذمہ داری ہے، بھارت اور اسرائیل انسانی حقوق کی پامالی کررہے ہیں،
اس دن کے موقع پر اقوام متحدہ کے اراکین مقبوضہ کشمیر اور فلسطین میں انسانی حقوق کی خلاف ورزیاں رکوانے کے لئے اپنا کردار ادا کریں ۔کامران خان ٹیسوری نے کہا کہ پاکستان میں تمام شہریوں کو یکساں انسانی حقوق کی فراہمی کو یقینی بنایا گیا ہے،اقلیتی آبادی کو ہر شعبہ زندگی میں آگے بڑھنے کے بھرپور مواقع حاصل ہیں۔
