اسلام آباد۔10جون (اے پی پی):گورنرخیبرپختونخوا فیصل کریم کنڈی نے کہا ہے کہ زرعی اور صنعتی ترقی میں بہتر کارکردگی کا مظاہرہ کرکے عوامی مسائل حل کرناہوں گے،وافر وسائل کے باوجود خیبرپختونخوا ملکی ترقی کی دوڑ میں پیچھے ہے۔ وزارت صنعت و پیداوار کی جانب سے جاری بیان کے مطابق ان خیالات کا اظہار انہوں نے پیر کووفاقی وزیر برائے صنعت و پیداوار اور نیشنل فوڈ سکیورٹی اینڈ ریسرچ رانا تنویر حسین سے ملاقات میں گفتگو کرتے ہوئے کیا۔
ملاقات میں باہمی دلچسپی کے امور اور خیبرپختونخوا میں زرعی و صنعتی ترقی پر تبادلہ خیال کیا گیا۔گورنر فیصل کریم کنڈی نے کہا کہ صوبائی حکومت کو ہر ممکن مدد فراہم کر رہے ہیں، زرعی اور صنعتی ترقی میں بہتر کارکردگی کا مظاہرہ کرکے عوامی مسائل حل کرناہونگے۔
اس موقع پر وفاقی وزیر رانا تنویر حسین نے کہا کہ وفاقی حکومت خیبرپختونخوا کے تمام زیر التوا مسائل ترجیحی بنیادوں پر حل کرے گی،وفاقی حکومت خیبرپختونخوا کو معاشی اور امن و امان کے مسائل حل کرنے میں مدد دے گی۔
