اسلام آباد۔14اگست (اے پی پی):نائب وزیراعظم و وزیر خارجہ سینیٹر محمد اسحاق ڈار نے کہا ہے کہ پاکستان کی ترقی بلوچستان کی ترقی سے وابسطہ ہے، ہمیں ملک دشمن عناصر پر کڑی نظر رکھنا ہوگی ، ملی یکجہتی کا مظاہرہ کرکے ملکی ترقی میں اپنا کردار اداکرنا ہوگا۔ دفتر خارجہ کی جانب سے جاری اعلامیہ کے مطابق ان خیالات کا اظہار انہوں نے یوم آزدی کی مناسبت سے بلوچستان اسمبلی کے سبزہ زار پر 77 ویں یوم آزادی کی تقریب سے مہمان خصوصی کی حیثیت سےخطاب کرتے ہوئے کیا۔انھوں نے کہا میں نے اپنی 31 سالہ سیاسی کیریر میں نوٹ کیا ہے کہ جب بھی پاکستان ترقی کی راہ پر گامزن ہو جاتا ہے تو چھپے ہاتھ اسے گرانے کی کوشش شروع کرتے ہیں۔
نائب وزیر اعظم نے کہا کہ بہت پرانی بات نہیں صرف2017 میں پاکستان دنیا کی 24 ویں بڑی معیشت بن چکا تھا، میکرو اکنامک انڈیکیٹرز اور بین الاقوامی ادارے لکھ رہے تھے پاکستان بین الاقوامی فارن انویسٹمنٹ کے حوالے دوسری بلواسطہ چوائس ہے، ہماری چھ فیصد گروتھ اور دو فیصد فوڈ انڈ فیشن تھی، اس ملک کی سٹاک ایکسچینج دنیا کی پانچویں بہترین اور جنوبی ایشیا کی نمبر ایک سٹاک ایکسچینج بن رہی تھی۔ انھوں نے کہا کہ آئیے مل کر عہد کریں کہ ہم کسی بھی سازش کا شکار نہیں ہوں گے اوراتحاد و اتفاق سے ان ترقی دشمن عناصر کا قلہ قمہ کریں گے۔
محمد اسحاق ڈار نے کہا کہ قائد اعظم محمد علی جناح اور علامہ محمد اقبال نے پاکستان کی ترقی کے لئے جو خواب دیکھے تھے آئیں مل کر ان عظیم ہستیوں کے خوابوں کی اتحاد و اتفاق سے تعبیر کریں ۔ انھوں نے کہا کہ پاکستان کو اللہ تعالیٰ نے معدنی وسائل سے نواز ا ہے ۔انہوں نے کہا کہ ذوالفقار علی بھٹو اور میاں محمد نواز شریف کی سربراہی میں پاکستان ایٹمی قوت بن گیا جو کام ذوالفقار علی بھٹو نے شروع کیا الحمد اللہ وہ کام میاں محمد نواز شریف نے پائیہ تکمیل کو پہنچایا ۔
نائب وزیر اعظم نے کہا پاکستان تا قیامت قائم رہیگا عوام دشمن قوتوں کے باتوں میں نہ آئیں اور آپس میں اتحاد اتفاق و بھائی چارے کے لئے کردار ادا کریں۔ان کا کہنا تھا کہ میں کل سے کوئٹہ میں یوم آزادی کی تقریبات غور سے دیکھ رہا ہوں یہاں کے عوام کا جذبہ دیکھ کر خوشی ہورہی ہے کہ ہم سارے محب وطن ہیں اور پاکستان کو معاشی سماجی علمی حوالے سے آگے دیکھنا چاہتے ہیں۔
قبل ازیں نائب وزیراعظم اسحاق ڈار نے مہمان خصوصی کی حیثیت سے قومی پرچم کی کشائی کی ،بلوچستان کانسٹیبلری کی چاک و چوبند دستے نے انہیں سلامی پیش کی۔ تقریب میں سکول کے بچوں نے ملی نغمے بھی پیش کئے۔ پرچم کشائی کی تقریب میں وزیر اعلیٰ میر سرفراز بگٹی، سپیکر قومی اسمبلی سردار ایاز صادق، وفاقی وزیر تجارت جام کمال خان، سپیکر صوبائی اسمبلی، ممبران اسمبلی کے ساتھ ساتھ پنجاب و صوبہ کے پی کے کے ایم پی ایز جن میں راحیلہ نعیم، آغا علی حیدر اور حادیہ نواز شامل ہیں، نے شرکت کی ۔اس موقع پر اعلیٰ سرکاری افسران اور قبائلی عمائدین بھی بڑی تعداد میں میں موجود تھے۔
Short Link: https://urdu.app.com.pk/urdu/?p=493644
