سمبڑیال۔ 24 اکتوبر (اے پی پی):محکمہ زراعت سمبڑیال نے کاشتکاروں کو کینولا کی کاشت فوری مكمل کرنے کی ہدایت کرتے ہوئے کہا ہے کہ بہترین موسمی حالات کے باعث رواں سال کینولا کی شاندار فصل ہونے کا امکان ہے۔
ان خیالات كا اظہار فیلڈ انویسٹی گیٹرلیاقت علی نے كسانوں كے ایك اجتماع سے گفتگو كرتے ہوئے كیا۔ انہوں نے كہا كہ اس بارسازگار موسمی حالات اور مناسب وتر کی موجودگی سے کینولا کی شاندار فصل حاصل ہوگی۔
انہوں نے کہاکہ کاشتکار پنجاب سرسوں اور خان پور رایاکی کاشت بھی مذکورہ شیڈول کے مطابق کر سکتے ہیں، مذکورہ کاشت کےلئے ڈیڑھ فٹ کے فاصلے پر قطاریں بنائی جائیں اور بوائی کے وقت ایک بوری ڈی اے پی اور آدھی بوری یوریا فی ایکڑ استعمال کرنے کے ساتھ ساتھ رایا سرسوں اور کینولا کا 2 کلوگرام بیج فی ایکڑ استعمال کریں۔انہوں نے کہاکہ فصل کو بوائی کے بعد پہلا پانی 15 سے 20 روز کے اندر، دوسرا پانی پھل نکلتے وقت اور تیسراپانی بیج بنتے وقت لگایاجائے،اس ضمن میں مزید رہنمائی کےلئے ماہرین زراعت کی خدمات سے بھی استفادہ کیاجاسکتاہے۔
