اسلام آباد۔16جنوری (اے پی پی):وزیراعظم محمد شہبا زشریف نے غزہ میں جنگ بندی کا خیرمقدم کرتےہوئے کہا ہے کہ پاکستان اقوام متحدہ کی قراردادوں کے مطابق مسئلہ فلسطین کے دو ریاستی حل کے اپنے موقف کا اعادہ کرتا ہے، جنگ زدہ علاقوں میں انسانی ہمدردی کی بنیاد پر امداد کی ترسیل انتہائی اہم ہے، امید ہے کہ جنگ بندی کا مکمل احترام کیاجائےگا۔
جمعرات کو وزیراعظم آفس کے میڈیاونگ سے جاری بیان کے مطابق وزیراعظم نے کہا کہ وہ اور پوری پاکستانی قوم فلسطین بالخصوص غزہ میں جنگ بندی کا خیر مقدم کرتے ہیں۔
امن کے حصول کے لیے قطر، سعودی عرب، امریکا، مصر اور دیگر دوست ممالک کی انتھک کوششیں ناقابل فراموش ہیں۔ وزیراعظم نے کہاکہ امن و امان کے قیام کے لئے غزہ اور دیگر جنگ زدہ علاقوں میں انسانی ہمدردی کی بنیاد پر امداد کی ترسیل انتہائی اہم ہے۔
ہمیں امید ہے کہ اس جنگ بندی کا مکمل طور پر احترام کیا جائے گا۔ پاکستانی عوام فلسطینی بھائیوں اور بہنوں کے ساتھ کھڑے ہیں اور گزشتہ کئی دہائیوں سےاسرائیلی جارحیت کے خلاف جد و جہد میں اپنی جان و مال کا نذرانہ پیش کرنے والوں کو خراج عقیدت پیش کرتے ہیں۔
انہوں نے کہا کہ پاکستان اقوام متحدہ کی قراردادوں کے مطابق مسئلہ فلسطین کے دو ریاستی حل کے اپنے موقف کا اعادہ کرتا ہے۔ 1967 سے قبل کی حدود پر مبنی القدس شریف دارالحکومت کے طور پر آزاد فلسطین ہی اس مسئلے کا پائیدار حل ہے۔
