اسلام آباد۔22جنوری (اے پی پی):وفاقی وزیر برائے منصوبہ بندی، ترقی و خصوصی اقدامات احسن اقبال کی زیر صدارت ایس آئی ایف سی کی ایگزیکٹو کمیٹی کا 12 واں اجلاس منعقد ہوا۔ اجلاس میں مختلف شعبوں کے تحت جاری منصوبوں اور پالیسی اقدامات پر پیشرفت کا جائزہ لیا گیا۔
اجلاس میں وفاقی وزراء، نیشنل کوآرڈینیٹر ایس آئی ایف سی، وفاقی سیکرٹریز، صوبائی چیف سیکرٹریز اور اعلیٰ سطح کے سرکاری افسران نے شرکت کی۔ بدھ کو جاری ایک پریس ریلیز کے مطابق اجلاس میں مختلف وزارتوں نے ایس آئی ایف سی کے فورم کے ذریعے چلائے جانے والے پراجیکٹس اور پالیسی سطح کے اقدامات پر پیشرفت پیش کی۔ کمیٹی نے صنعت، زراعت و لائیوسٹاک، کانیں و معدنیات، تیل و گیس اور بندرگاہوں جیسے اہم شعبوں سے متعلق پالیسی پہلوؤں پر تفصیلی تبادلہ خیال اور اتفاق رائے پیدا کیا۔
اجلاس میں وزیراعظم کی زیر صدارت 11 ویں ایپکس کمیٹی اجلاس میں خصوصی اقتصادی زونز کے منظور کئے گئے فریم ورک میں تجدید شدہ نقطہ نظر پر تیز عملدرآمد کی ہدایات دی گئیں ۔ کمیٹی نے اس بات پر زور دیا کہ ملک میں صنعتکاری کو فروغ دینے کے لئے متعلقہ سٹیک ہولڈرز کے درمیان قریبی ہم آہنگی اور تعاون ضروری ہے۔
کمیٹی نے گودام اور لاجسٹکس کے شعبے کو صنعت کا درجہ دینے کے لئے جاری کوششوں کو سراہا اور منظوری کے عمل کو تیز کرنے کی ہدایات دیں۔ اس پالیسی اقدام کا مقصد برآمدات، زراعت اور مینوفیکچرنگ کے شعبوں کو سپورٹ کرنے کے لئے جدید سپلائی چین کے بنیادی ڈھانچے کی ترقی کے لئے سرمایہ کاری کو غیر مقفل کرنا ہے۔ اس اقدام سے پاکستان کو عالمی اور علاقائی سپلائی چین میں ایک ترجیحی ملک کے طور پر جگہ دی جا سکتی ہے۔
کمیٹی نے بندرگاہوں اور جہاز رانی کے بنیادی ڈھانچے سے متعلق مختلف پہلوؤں پر تیز عملدرآمد کی ہدایات دیں۔ کمیٹی کی ہدایات کے مطابق برآمدات اور درآمدات کو آسان بنانے کے لئے ٹرمینل ہینڈلنگ کو بہتر بنانا شامل ہے۔ کمیٹی نے ایس آئی ایف سی کے فورم کو استعمال کرتے ہوئے پالیسی سطح کے اقدامات اور سٹیک ہولڈرز کی مشاورت کے ذریعے مختلف زیر التواء کراس سیکٹرل معاملات کو تیز کرنے کی ہدایات دیں۔
اس اجلاس کا مقصد ملک میں سرمایہ کاری کے ماحول کو مزید بہتر بنانا اور مختلف شعبوں میں ترقی کی راہ ہموار کرنا تھا، تاکہ پاکستان عالمی سطح پر اپنے مقام کو مضبوط بنا سکے۔
