فیصل آباد۔ 29 جنوری (اے پی پی):ماہ فروری میں موسم صاف ہونے اور دھوپ لگنے سے آم کی گدھیڑی، کپاس کی گدھیڑی، ڈسکی کاٹن بگ، ریڈ کاٹن، امریکن اور گلابی سنڈیوں کے ممکنہ حملہ کے خدشہ کے پیش نظر کاشتکاروں کو فوری حفاظتی و تدارکی اقدامات کی ہدایت کی گئی ہے تاکہ مختلف پھلوں کو نقصان سے بچایاجاسکے۔
جامعہ زرعیہ فیصل آباد کے ماہر ین حشرات نے بتایا کہ آم کی گدھیڑی، کپاس کی گدھیڑی، ڈسکی کاٹن بگ، ریڈ کاٹن، امریکن اور گلابی سنڈیاں اس وقت سردیوں کا موسم سرمائی نیند میں گزاررہی ہیں تاہم فروری میں موسم صاف ہونے اور دھوپ لگنے سے آم کی گدھیڑی کے انڈے آم کے درختوں کے چھلکوں کی اندرونی سطح، گرے ہوے پتوں،بچے کھچے تنکوں کے ڈھیر کے نیچے اور زمین کی دراڑوں میں سے انڈوں سے بچے نکلنے شروع ہوجائیں گے۔
انہوں نے باغبانوں کو سفارش کی کہ وہ پودوں کے نیچے ہلکی گوڈی کریں تاکہ اس عمل سے انڈے باہر آجائیں اورانہیں پرندے کھالیں۔ انہوں نے بتایاکہ گھروں میں آم کے جن پودوں پر گزشتہ سال گدھیڑی کا حملہ موجود تھا ان دیواروں کے باہر دراڑوں کی صفائی کریں اس طرح گدھیڑی کے انڈے کورے اور سردی سے تلف ہو جائیں گے مزید برآں دیواروں کی مٹی پر اور پودوں کے نیچے تنے کے ارد گرد کوپیکس زہر کا دھوڑا کرنے سے بھی بچے تلف ہوجائیں گے۔
انہوں نے کہاکہ باغبان دس دن کے وقفے سے پروفینوفاس زہر بحساب 800ملی لٹر فی 100لٹر پانی میں ملا کر دو دفعہ سپرے کریں اور آم کی گدھیڑی کو پودوں پرچڑھنے سے روکنے کے لیے تنوں پر دو سے تین فٹ اونچائی پر پلاسٹک کے بند لگادیں۔انہوں نے کہاکہ کپاس کے خالی کھیتوں اورچھڑیوں کے ڈھیروں کے نیچے موجود خشک پتوں، ٹینڈوں،کھوکھڑیوں اورزمین کی دراڑوں میں ڈسکی کاٹن بگ اورکپاس کے ڈبل بیج میں گلابی سنڈی موجود ہے اسلئے ایندھن کے لیے رکھی ہوئی کپاس کی چھڑیوں کو فروری کے وسط تک جلا کر ختم کردیں اورخالی کھیتوں میں روٹا ویٹر چلا کر ان کیڑوں کو تلف کریں۔
انہوں نے کہاکہ جننگ فیکٹریوں کے بچے کھچے مواد کو جلادیں یا گہرا دفن کریں کیونکہ کپاس کے علاقوں میں درختوں اور جڑی بوٹیوں کے چوڑے پتوں کی سرنگوں میں ڈسکی بگ موجود ہے۔ انہوں نے کہاکہ درختوں کی چھنگائی بھی کی جائے اورکھیت کی وٹوں و کھال کناروں پر موجود جڑی بوٹیوں کو تلف کردیاجائے۔انہوں نے بتایاکہ درختوں پر امیڈا کلوپرڈ 200ایس ایل بحساب 200لٹر فی 100 لٹر پانی میں ملا کر سپرے کرنے سے بھی ڈسکی بگ تلف ہوجائے گا نیزآئندہ کاشت ہونے والی فصلیں ان نقصان رساں کیڑوں کے حملوں سے محفوظ ہو جائیں گی۔انہوں نے کہاکہ سپرے کم ہونے کی وجہ سے ان فصلوں پرہونے والے خرچہ کی بھی بچت ہوگی۔
Short Link: https://urdu.app.com.pk/urdu/?p=553137
