ملتان ۔ 07 فروری (اے پی پی):کمشنر ملتان ڈویژن عامر کریم خاں نے سوسائٹی فار سپیشل پرسنز، چرچ آف جیزز کرائسٹ کے زیر اہتمام تقریب تقسیم وہیل چیئرز سے خطاب کرتے ہوئے کہا کہ ویل چیئر معذور افراد کی زندگی کو بہتر بنانے کے لیے بہت اہم ہے۔ہم خدا کا شکر ادا کرتے ہیں کہ اللہ نے ہمیں مکمل اعضاء کیساتھ پیدا کیا، ہمیں افراد باہم معذوری کی مشکلات کا ادراک کرنا چاہیے، باہم معذورافراد کے ساتھ جڑ کر انکی مشکلات کا حل کیا جاسکتا ہے،لوکل سطح پر ویل چیئر کا بننا بہت خوش آئند ہے،سوسائٹی فار اسپیشل پرسنز کے ویل چیئر پروگرام میں ہم ان کے ساتھ،مزید مضبوط بنائیں گے،سرکاری و پبلک مقامات تک معذور افراد کی سہل اور یکساں رسائی ممکن بنانے کیلئے اقدامات کئے جائیں گے،معذور افراد دیگر افراد کی طرح مواقع کے مستحق ہیں۔
چیئرپرسن سوسائٹی فار سپیشل پرسنز زاہدہ حمید نے کہا کہ پاکستان کی 15 فیصد آبادی افراد باہم معذوری پر مشتمل ہے، ویل چئیرز کیلئے چرچ آف جیزز کرائسٹ ایل ڈی ایس اور مخیر حضرات کا تعاون حاصل ہے،معذور افراد نے ہی وہیل چیئرز بنائیں، انکو روزگار ملا اور دوسرے معذور افراد کو ویل چئیرز ملیں، دوسرے مرحلے میں معذور بچوں کو ویل چئیرز فراہم کی جائیں گی،کسٹمائزڈ وئیل چئیرز افراد باہم معذوری کیلئے ناگزیر ہیں، اس وقت تک ہمارا ادارہ 5ہزار سے زیادہ ویل چیئر بنا کر تقسیم کر چکا ہے۔ مذکورہ تقریب میں 500 ویل چئیرز تقسیم کی گئ ہیں۔ ویل چیئر مینوفیکچرر میں سرٹیفیکیٹ تقسیم جبکہ سپانسرز کو ملتانی اجرک پہنائی گئی۔
Short Link: https://urdu.app.com.pk/urdu/?p=557040
