کوئٹہ۔ 21 فروری (اے پی پی):جامعہ تربت جلد ہی انڈرگریجویٹ سکالرشپس کااعلان کرے گی ،یہ سکالرشپس مخیر حضرات کے تعاون سے فراہم کی جائیں گی تاکہ جامعہ تربت میں زیرتعلیم مستحق اورمالی مشکلات سے دوچار طلبہ وطالبات کی مالی معاونت کی جا سکے۔ اس سلسلے میں جامعہ تربت میں زیرتعلیم ضرورت مند اورمستحق طلبہ وطالبات سے مجوزہ قوائدوضوابط کے مطابق آئندہ ہفتے درخواستیں طلب کی جائیں گی۔اس بات کا فیصلہ جامعہ تربت کے وائس چانسلر پروفیسر ڈاکٹر گل حسن کی زیرِ صدارت وائس چانسلر سیکرٹریٹ میں منعقدہ ایک اجلاس میں کیا گیا۔اجلاس میں یہ بھی فیصلہ کیا گیا کہ بہت جلدبورڈ آف ٹرسٹیز کاقیام عمل میں لایا جائے گا تاکہ میر تاج محمدرند سکالرشپ،میر الٰہی بخش رند سکالرشپ،کریم دشتی سکالرشپ اورنیک محمد بزدار سکالرشپ سمیت انڈومنٹ فنڈ کے حجم میں اضافہ کیاجاسکے۔
ان سکالرشپس کامقصد مالی مشکلات کا شکار اور ضرورت مند طلبہ وطالبات کو اعلیٰ تعلیم کے مواقع فراہم کرنا ہے تاکہ وہ جامعہ تربت میں اپناتعلیمی سفرجاری رکھ سکیں۔ جامعہ تربت میں ان سکالرشپس کوجاری کرانے پر وائس چانسلر پروفیسر ڈاکٹر گل حسن نے میر تاج محمدرند اور میر الٰہی بخش رند سکالرشپس کے ڈونر ڈاکٹر شبیر رند،کریم دشتی سکالرشپ کے ڈونر ایڈوکیٹ جاڈین دشتی اور نیک محمد بزدار کا دل کی گہرائیوں سے شکریہ ادا کیا۔ڈاکٹر گل حسن نے معاشرے کے خوشحال افراد، کاروباری برادری اور زندگی کے مختلف شعبوں سے تعلق رکھنے والے مخیرحضرات سے پرزور اپیل کی کہ وہ بھی اس نیک مقصد میں اپنا حصہ ڈالیں۔ انہوں نے کہاکہ حصول تعلیم کے لئے ضرورت منداورمستحق طلبہ وطالبات کی معاونت کرکے مخیرحضرات علاقے کی ترقی وخوشحالی میں نمایاں کردار ادا کر سکتے ہیں۔
وائس چانسلر نے اس بات کا اعادہ کیا کہ جامعہ تربت طلبا کے لیے انڈومنٹ فنڈز کو بڑھانے اور سکالرشپ پروگراموں کو وسعت دینے کے لیے پْرعزم ہے تاکہ مستحق طلباء مالی مشکلات کے بغیر اعلیٰ تعلیم حاصل کر سکیں
Short Link: https://urdu.app.com.pk/urdu/?p=564619
