اسلام آباد۔25فروری (اے پی پی):قومی اسمبلی کی قائمہ کمیٹی برائے امور خارجہ کا 9واں اجلاس منگل کو پارلیمنٹ ہاؤس میں رکن قومی اسمبلی حنا ربانی کھر کی زیر صدارت منعقد ہوا۔ کمیٹی نے دنیا بھر میں پاکستان کے قونصل خانوں کی حیثیت سمیت اہم امور پر غور کیا۔ چیئرپرسن کے علاوہ کمیٹی کے ممبران رکن قومی اسمبلی علی زاہد، نزہت صادق، فرح ناز اکبر، ڈاکٹر فاروق ستار، اعجاز الحق، ڈاکٹر امجد علی خان، اسفانیار ایم بھنڈارا، سید مصطفیٰ محمود، عاطف خان، ایم ایس گلزار خان اور محمد خان ڈانڈھلہ نے اجلاس میں شرکت کی۔
دانیال چوہدری نے زوم کے ذریعے اجلاس میں شرکت کی۔ کمیٹی نے بیرون ملک پاکستانی قونصل خانوں کی مجموعی صورتحال کا جائزہ لیا۔ وزارت نے ہر قونصل خانے میں افسران اور عملے کی تعداد، قونصلر عمارتوں کی ملکیت کی حیثیت کے ساتھ قابل اطلاق جگہوں پر کرایہ کی تفصیلات، مقامی عملے کی ملازمت اور قونصل خانے میں تعینات دیگر وزارتوں/ اداروں کے افسران کے بارے میں تفصیلات فراہم کیں۔
اہم کامیابیوں کو اجاگر کرتے ہوئے گزشتہ پانچ سالوں میں قونصلر آپریشنز کی کارکردگی کا جائزہ پیش کیا گیا۔ وزارت تجارت، وزارت اطلاعات و نشریات اور ایف آئی اے نے بھی کمیٹی کو ان کی بیرون ملک موجودگی اور دیگر ممالک کے ساتھ پاکستان کے تعلقات کو مضبوط بنانے کے لیے کی جانے والی سرگرمیوں کے بارے میں بتایا۔ چیئرپرسن حنا ربانی کھر نے بیرون ملک پاکستانی مشنز کی قونصلر موجودگی پر تبصرہ کرتے ہوئے وزارت خارجہ، تجارت اور دیگر پر زور دیا کہ وہ حقائق کے مطابق اپنی قونصلر موجودگی کا جائزہ لیں۔
Short Link: https://urdu.app.com.pk/urdu/?p=566299
