لاہور۔11مارچ (اے پی پی):سرگودھا کے علاقے ساہیوال میں ایک افسوسناک واقعہ پیش آیا جہاں شوہر نے اپنی بیوی کو قتل کر کے اسے خودکشی کا رنگ دینے کی کوشش کی۔چیئرپرسن پنجاب ویمن پروٹیکشن اتھارٹی حنا پرویز بٹ نے اس واقعے کا سخت نوٹس لیتے ہوئے ملزم کو سخت سے سخت سزا دینے کی ہدایت کی ہے۔
ترجمان ویمن پروٹیکشن اتھارٹی کے مطابق 8 مارچ 2025 کو شاہد نامی شخص نے 15 پر کال کر کے اطلاع دی کہ اس کی بیوی عائشہ نے خودکشی کر لی ہے۔
مقامی پولیس اور پی ایف ایس اے کی ٹیمیں فوری طور پر موقع پر پہنچیں۔ جائے وقوعہ کے معائنے کے دوران شواہد سامنے آئے کہ خودکشی کا دعوی حقیقت کے برعکس تھا۔ کرائم سین کی جانچ، لاش پر موجود نشانات اور بعد ازاں پوسٹ مارٹم رپورٹ نے تصدیق کی کہ یہ قتل کا واقعہ تھا۔پولیس نے تفتیش کے دوران شوہر شاہد کو گرفتار کر کے جب تحقیقات کیں تو اس نے اعتراف جرم کر لیا۔
ملزم نے بتایا کہ اس نے اپنی بیوی کو بانجھ پن کی بنا پر قتل کیا اور خودکشی کا ڈرامہ رچانے کی کوشش کی۔حنا پرویز بٹ کا کہنا تھا کہ حکومت پنجاب خواتین کے تحفظ پر کوئی سمجھوتہ نہیں کرے گی اور ایسے مجرموں کو کیفر کردار تک پہنچایا جائے گا۔ مزید قانونی کارروائی جاری ہے۔
Short Link: https://urdu.app.com.pk/urdu/?p=571078
