اسلام آباد۔15مارچ (اے پی پی):قائمقام صدر سید یوسف رضا گیلانی نے کہا ہے کہ پاکستان نے اسلاموفوبیا کے خلاف عالمی دن کو اقوام متحدہ سے منظور کرانے میں قائدانہ کردار ادا کیا ،جھوٹی خبروں اور غلط معلومات کے ذریعے اسلام کو ایک متشدد مذہب کے طور پر پیش کیا جاتا ہے ،بعض ممالک میں سیاسی گروہ اور انتہا پسند افراد مسلمانوں کے خلاف نفرت انگیز مہمات چلاتے ہیں اور اسلاموفوبیا کو سیاسی مقاصد کے لیے بھی استعمال کیا جا رہا ہے، جس سے مسلمانوں کے خلاف تعصب میں اضافہ ہو رہا ہے۔
ایوان صدر میڈیا ونگ کے مطابق اسلاموفوبیا سے نمٹنے کے عالمی دن کے موقع پر اپنے پیغام میں انہوں نے کہا کہ آج پاکستان اور دنیا بھر کے مسلمان اسلاموفوبیا سے نمٹنے کا عالمی دن منا رہے ہیں۔ یہ دن اس امر کی یاد دہانی کراتا ہے کہ مسلمانوں کے خلاف عالمی سطح پر تعصب، نفرت اور امتیازی سلوک کے خلاف متحد ہو کر آواز بلند کرنا ناگزیر ہے۔ انہوں نے کہا کہ یہ دن منانے کا مقصد دنیا کو اسلاموفوبیا کے خطرناک نتائج سے بھی آگاہ کرنا ہے ۔ مسلمانوں کو دنیا میں اسلام اور مسلمانوں کے خلاف پھیلائی جانے والی غلط فہمیوں اور منفی پروپیگنڈے کی وجہ سے بہت سے چیلنجز درپیش ہیں،بہت سے مغربی ممالک میں اسلاموفوبیا کے باعث مسلمانوں کے خلاف پرتشدد واقعات بھی ہوئے جس میں کئی بے گناہ مسلمانوں کو شہید کیا گیا۔
قائمقام صدر نے کہا کہ آج کے دن ہم اسلاموفوبیا اور اس سے منسلک پرتشدد واقعات کے نتیجے میں اپنی جانیں کھو دینے والےمسلمانوں کو بھی یاد کرتے ہیں۔ انہوں نے کہا کہ پاکستان کو فخر ہے کہ اس نے اسلاموفوبیا کے خلاف عالمی دن کو اقوام متحدہ سے منظور کرانے میں قائدانہ کردار ادا کیا،پاکستان نے ہمیشہ ہر فورم پر اس مسئلے کو اجاگر کیا اور عالمی برادری کو اس کے تدارک کے لیے عملی اقدامات اٹھانے پر آمادہ کرنے میں کلیدی کردار ادا کیا۔مغربی میڈیا میں بعض اوقات اسلام اور مسلمانوں کو دہشت گردی یا انتہا پسندی سے جوڑا جاتا ہے، جس سے عام عوام میں غلط تاثر پیدا ہوتا ہے، سوشل میڈیا پر جھوٹی خبروں اور غلط معلومات کے ذریعے اسلام کو ایک متشدد مذہب کے طور پر پیش کیا جاتا ہے۔
علاوہ ازیں بعض ممالک میں سیاسی گروہ اور انتہا پسند افراد مسلمانوں کے خلاف نفرت انگیز مہمات چلاتے ہیں اور اسلاموفوبیا کو سیاسی مقاصد کے لیے بھی استعمال کیا جا رہا ہے، جس سے مسلمانوں کے خلاف تعصب میں اضافہ ہو رہا ہے۔ قائمقام صدر سید یوسف رضا گیلانی نے کہا کہ اسلاموفوبیا کے تدارک کے لیے ضروری ہے کہ عالمی سطح پر مذاہب کے احترام کو یقینی بنایا جائے اور نفرت انگیز بیانیے کے خلاف مؤثر قانون سازی کی جائے۔ بین المذاہب ہم آہنگی اور مکالمے کو فروغ دیا جائے تاکہ غلط فہمیاں ختم ہوں اور مختلف مذاہب کے درمیان بھائی چارہ قائم ہو۔ مسلمانوں کو چاہیے کہ وہ مختلف میڈیا کے ذریعے اسلام کی حقیقی، پُرامن اور انسانی حقوق پر مبنی تعلیمات کو فروغ دیں۔
علاوہ ازیں، مسلمانوں کو چاہیے کہ وہ مغربی ممالک میں اپنی شناخت کو برقرار رکھتے ہوئے وہاں کے معاشروں میں مثبت اور تعمیری کردار ادا کریں۔ انہوں نے کہا کہ پاکستان عالمی سطح پر اسلاموفوبیا کے خلاف اپنی جدوجہد جاری رکھے گا اور ہر فورم پر مسلمانوں کے حقوق کا دفاع کرے گا۔ میں دنیا بھر کے رہنماؤں، میڈیا، اور سول سوسائٹی سے اپیل کرتا ہوں کہ وہ اسلام اور مسلمانوں کے خلاف نفرت کے خاتمے کے لیے عملی اقدامات کریں۔
پاکستان اس عزم کا اعادہ کرتا ہے کہ وہ بین الاقوامی برادری کے ساتھ مل کر اسلاموفوبیا کے خاتمے کے لیے اپنی سفارتی، سیاسی اور سماجی کوششیں جاری رکھے گا۔ آئیے، ہم سب مل کر رواداری، بھائی چارے، اور امن کے فروغ کے لیے کام کریں اور ایک ایسی دنیا تشکیل دیں جہاں ہر انسان کو عزت، وقار اور مساوی حقوق حاصل ہوں۔
Short Link: https://urdu.app.com.pk/urdu/?p=572907
