لاہور۔15مارچ (اے پی پی):صوبائی وزیر صنعت و تجارت چوہدری شافع حسین سے سابق وفاقی وزیر چوہدری نوریز شکور نے ملاقات کی جس میں ملک کی مجموعی سیاسی صورتحال اور پنجاب میں اقتصادی سرگرمیوں کے فروغ پر گفتگو ہوئی۔ملاقات کے دوران ملک میں رواداری کی سیاست کے فروغ اور استحکام پاکستان کیلئے چوہدری شجاعت حسین کی کاوشوں کو سراہا گیا۔صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہا ہے کہ پاکستان مسلم لیگ کے صدر چوہدری شجاعت حسین کی قیادت میں پارٹی کو ہرسطح پر مضبوط اور متحرک کریں گے۔
انہوں نے کہا کہ پنجاب میں اقتصادی سرگرمیوں کے فروغ کیلئے نتیجہ خیز اقدامات کئے گئے ہیں،قائد اعظم بزنس پارک شیخوپورہ میں گارمنٹ سٹی کے بننے سے ٹیکسٹائل سیکٹر فروغ پائے گا جس سے ملک کی برآمدات میں اضافہ ہوگا۔انہوں نے کہا کہ پنجاب میں تیزی سے لگنے والے کارخانوں سے مقامی لوگوں کیلئے روزگار کے مواقع بڑھ رہے ہیں۔صوبائی وزیر نے کہا کہ فیڈمک کے زیر اہتمام انڈسٹریل سٹیٹس میں صنعتی انفراسٹرکچر کو بہتر کیا گیا ہے۔انہوں نے کہا کہ چوہدری شجاعت حسین کی قیادت میں مل کر عوامی خدمت کا سفر جاری رکھیں گے،ساہیوال میں ویمن انکیو بیشن سینٹر بنایا جائے گا۔
چوہدری نوریز شکور نے کہا کہ چوہدری شجاعت حسین نے ہمیشہ رواداری،برداشت اورتحمل کی سیاست کی ہے ، ان سے دیرینہ تعلقات ہیں جبکہ نہایت ملنسار شخصیت ہیں ،جلد پاکستان مسلم لیگ کے صدر چوہدری شجاعت حسین سے ملاقات کروں گا۔پاکستان مسلم لیگ کے ذرائع کے مطابق چوہدری نوریز شکور سابق وزیر اعظم چوہدری شجاعت حسین سے ملاقات کر کے مسلم لیگ (ق) میں شمولیت کا اعلان کریں گے۔ملاقات کے دوران ایوان صنعت و تجارت لاہور کے سابق صدر وسابق چیئرمن لاہور جمخانہ کلب مصباح الرحمن،مسلم لیگ (ویمن) ساہیوال ڈویژن کی صدر حمیرا بخاری،پراسیکیوٹر جنرل پنجاب فرہاد شاہ اور ساہیوال ڈویژن کی سیاسی وسماجی شخصیات بھی موجود تھیں۔
Short Link: https://urdu.app.com.pk/urdu/?p=572916
