اسلام آباد۔26مارچ (اے پی پی):پاکستان سپیس اینڈ اپرایٹموسفیئر ریسرچ کمیشن (سپارکو)نے سائنسی تجزیوں، فلکیاتی اور جدید مشاہداتی ڈیٹا کی بنیاد پر شوال 1446 ہجری کے ہلال کی رویت کے حوالے سے پیشنگوئی جاری کی ہے۔ سپارکو کی جانب سے بدھ کو جاری پریس ریلیز میں کہا گیا ہے کہ فلکیاتی ماڈلز کے مطابق شوال کا نیا چاند 29 مارچ کو پاکستان معیاری وقت کے مطابق 15 بجکر 58 پر تشکیل پائے گا تاہم ہلال کی رویت کا انحصار اہم عوامل جیسے چاند کی عمر، سورج سے زاویائی فاصلہ، غروبِ آفتاب کے وقت بلندی اور ماحولیاتی حالات پر ہوگا۔
30 مارچ کو (29 رمضان) کے لئے پاکستان میں سائنسی تجزیہ کے مطابق غروبِ آفتاب کے وقت چاند کی عمر تقریباً 27 گھنٹے، چاند اور سورج کا زاویائی فاصلہ تقریباً 16 ڈگری، غروبِ آفتاب کے وقت چاند کی بلندی تقریباً 14 ڈگری، روشنی 2 فیصد اور ہلال کے نظر آنے کا امکان ہے جبکہ چاند انسانی آنکھ سے آسانی سے نظر آئے گا۔ بیان کے مطابق ان سائنسی پیمانوں کو مدنظر رکھتے ہوئے 30 مارچ کو پاکستان میں چاند کے نظر آنے کا امکان نہایت روشن ہے۔
لہٰذا رمضان کے29 دن مکمل ہونے کی توقع ہے اور عید الفطر کا پہلا دن 31 مارچ کو منایا جائے گا۔ بیان میں مزید کہا گیا ہے کہ سعودی عرب میں 29 مارچ کو چاند کے نظر آنے کے امکانات تقریباً نہ ہونے کے برابر ہیں کیونکہ مکہ میں غروبِ آفتاب کے وقت چاند کی عمر تقریباً 5 گھنٹے ہوگی۔ اس تناظر میں سعودی عرب اور مشرقِ وسطیٰ میں ہلال 30 مارچ کو نظر آئے گا اور وہاں بھی عید الفطر 31 مارچ کو منائی جائے گی۔
سپارکو کے مطابق چونکہ عید الفطر کے موقع پر چاند کی رویت کا فیصلہ رویتِ ہلال کمیٹی کی ذمہ داری ہے لہٰذا مرکزی رویتِ ہلال کمیٹی ملک بھر سے موصول ہونے والی گواہیوں کا جائزہ لے کر شوال 1446 ہجری کا باقاعدہ اعلان کرے گی۔ اگرچہ سائنسی ڈیٹا 30 مارچ کو ہلال کے نظر آنے کی مضبوط تائید کرتا ہے لیکن مرکزی رویت کمیٹی کا حتمی فیصلہ چشم دید گواہیوں اور مشاہدے کے وقت مقامی موسمی حالات پر منحصر ہوگا۔
Short Link: https://urdu.app.com.pk/urdu/?p=576434
