اسلام آباد۔8اپریل (اے پی پی):پاکستان منرلز انویسٹمنٹ فورم 2025 ءکے موقع پر وفاقی وزیر پٹرولیم علی پرویز ملک سےسعودی عرب کے ڈپٹی وزیر مائننگ عبدالرحمن البلوشی کی قیادت میں ایک اعلیٰ سطحی وفد نے ملاقات کی۔ ملاقات میں توانائی اور معدنیات کے شعبوں میں باہمی تعاون کو بڑھانے پر تبادلہ خیال کیا گیا۔ ترجمان پٹرولیم ڈویژن کی جانب سے جاری اعلامیہ کے مطابق ملاقات کا مقصد دوطرفہ تعلقات کو مضبوط بنانے اور پاکستان کے تیل، گیس اور معدنی وسائل میں سرمایہ کاری کے مواقع تلاش کرنا تھا۔ وزیر پٹرولیم علی پرویز ملک نے پاکستان کے توانائی کے شعبے، خاص طور پر معدنیات اور کان کنی میں موجود وسیع مواقعوں پر روشنی ڈالی اور سرمایہ کار دوست پالیسی فریم ورک کے ذریعے غیر ملکی سرمایہ کاروں کو سہولت فراہم کرنے کے حکومتی عزم کا اعادہ کیا۔ سعودی ڈپٹی وزیر برائے مائننگ نے کامیاب پاکستان منرلز انویسٹمنٹ فورم کی تعریف کی۔
انہوں نے مزید کہا کہ اس فورم کا انعقاد ہر سال ہونا چاہیے جس پر علی پرویز ملک نے وفد کو آگاہ کیا کہ پاکستان پہلے ہی اسے سالانہ سرگرمی بنانے کا عہد کر چکا ہے۔ سعودی جیولوجیکل سروے کے سی ای او عبداللہ الشمرانی نے پاکستان جیولوجیکل سروے کی ٹیم کو علم کے تبادلے اور ٹیکنالوجی کے تعاون کے لیے سعودی عرب کا دورہ کرنے کی دعوت دی۔ وفد نے پاکستان کے توانائی اور معدنی شعبوں میں گہری دلچسپی کا اظہار کیا۔ گفتگو میں مشترکہ منصوبوں، ٹیکنالوجی کی منتقلی اور وسائل کے زیادہ سے زیادہ استعمال اور پائیدار ترقی کے لیے صلاحیت کی تعمیر جیسے امور پر بھی تبادلہ خیال کیا گیا۔ وفاقی وزیر علی پرویز ملک کا کہنا تھا کہ پاکستان سعودی عرب کے ساتھ اپنے گہرے تعلقات کو قدر کی نگاہ سے دیکھتا ہے
اور پاکستان کی توانائی اور کان کنی کی صنعتوں میں سعودی سرمایہ کاری میں اضافے کی توقع رکھتا ہے۔ انہوں نے سعودی حکومت کی مسلسل حمایت کو سراہا اور پاکستانی حکام کی طرف سے مکمل تعاون کی یقین دہانی کرائی۔ وفاقی وزیر تجارت جام کمال خان بھی اس موقع پر موجود تھے
Short Link: https://urdu.app.com.pk/urdu/?p=579631
