اسلام آباد۔16اپریل (اے پی پی):وفاقی وزیر برائے پٹرولیم علی پرویز ملک سے کویت کے سفیر نصر عبدالرحمن المطیری نے ملاقات کی، ملاقات میں دونوں ممالک کے درمیان توانائی کے شعبے میں دوطرفہ تعاون کو مضبوط بنانے اور پاکستان کے پٹرولیم سیکٹر میں سرمایہ کاری کے نئے راستوں کو تلاش کرنے پر تبادلہ خیال کیا گیا۔ وزارت پٹرولیم ڈویژن کی جانب سے جاری اعلامیہ کے مطابق کویتی سفیر نے وزیراعظم شہباز شریف کی قیادت میں پاکستان کی نمایاں معاشی ترقی خاص طور پر معیشت کو مستحکم کرنے اور سرمایہ کاری کے ماحول کو بہتر بنانے پر خراج تحسین پیش کیا۔
انہوں نے پاکستان کی ترقی کے سفر پر اعتماد کا اظہار کیا اور دونوں ممالک کے درمیان معاشی اور توانائی کے شعبوں میں شراکت داری کو مضبوط کرنے کے کویت کے عزم کا اعادہ کیا۔ وفاقی وزیر علی پرویز ملک نے کویت کی حمایت کو سراہتے ہوئے پاکستان کے لئے خصوصی رعایت کا شکریہ ادا کیا۔ انہوں نے کہا کہ پاکستان کویت پٹرولیم کی طرف سے دو سال کے لئے بڑھائی گئی کریڈٹ سہولت پر بے حد شکرگزار ہے۔
پی ایس او اور کویت پٹرولیم کی شراکت داری بہترین ہے ۔ انہوں نے مزید کہا کہ کو فپیک (KUFPEC) پہلے ہی ایکسپلوریشن کے شعبے میں موجود ہے اور ان کی آف شور ایکسپلوریشن میں دلچسپی کا خیرمقدم کرتے ہیں۔ وفاقی وزیر علی پرویز ملک نے کویت کے سفیر کا مسلسل تعاون پر شکریہ ادا کیا اور خلیجی ممالک خاص طور پر توانائی اور تجارت کے شعبوں میں تعلقات کو مزید مضبوط بنانے کے لئے پاکستان کی عزم کا اظہار کیا۔
انہوں نے کہا کہ وزیراعظم شہباز شریف کویت کے عوام، امیر کویت اور ولی عہد کے لئے بے پناہ محبت اور احترام رکھتے ہیں۔ ملاقات میں فریقین نے پاکستان اور کویت کے درمیان پائیدار تعلقات کو مزید مضبوط بنانے پر اتفاق کیا۔
Short Link: https://urdu.app.com.pk/urdu/?p=582848
