اسلام آباد۔16اپریل (اے پی پی):علامہ اقبال اوپن یونیورسٹی میں ایجوکیشن ایکسپو 2025 کا کامیاب اور شاندار انعقاد کیا گیا جسے طلبہ، اساتذہ اور شرکاء کی جانب سے بھرپور پذیرائی حاصل ہوئی۔ اس ایکسپو کا مقصد نوجوان نسل کو تعلیمی، پیشہ ورانہ اور تکنیکی ترقی کی راہوں سے روشناس کرانا تھا۔ایکسپو میں ملک بھر کی مختلف جامعات، صنعتی و تجارتی اداروں اور تحقیقی تنظیموں نے اپنے معلوماتی سٹالز قائم کیے جنہوں نے طلبہ کو کیریئر گائیڈنس، جدید ٹیکنالوجی، ہنر مندی اور تعلیمی مواقع کے حوالے سے مفید معلومات فراہم کیں۔ ایکسپو کا اہتمام یونیورسٹی کے اورک آفس نے کیا تھا۔
تقریب کے آغاز پر جامعہ کے وائس چانسلر نے فیکلٹی آف سوشل سائنسز کے ڈین، پروفیسر ڈاکٹر عبدالعزیز ساحر، فیکلٹی آف سائنسز کے ڈین، پروفیسر ڈاکٹر شیر محمد، رجسٹرار راجہ عمر یونس، ڈائریکٹر ایڈمنسٹریشن و کوآرڈینیشن، پروفیسر ڈاکٹر سید عامر شاہ، ایڈیشنل ڈائریکٹر اورک، ڈاکٹر صائمہ ناصر، اور دیگر اعلیٰ افسران کے ہمراہ تمام سٹالز کا معائنہ کیا۔تقریب سے خطاب کرتے ہوئے وائس چانسلر، ڈاکٹر ناصر محمود نے کہاکہ مجھے اپنی یونیورسٹی کی ٹیم، خصوصاً اورک آفس کی ایڈیشنل ڈائریکٹر، ڈاکٹر صائمہ ناصر کی انتھک محنت، لگن اور جذبے پر بے حد فخر ہے۔
انہی کی قیادت اور کوششوں کی بدولت ہم مسلسل دوسری بار ایجوکیشن ایکسپو کو کامیابی سے منعقد کرنے میں کامیاب ہوئے ہیں۔بعدا زاں وائس چانسلر نے ”گرین پاکستان مہم” کے تحت جامعہ کے گرائونڈ میں ایک پودا لگا کر ماحولیاتی بہتری کے عزم کا اعادہ کیا۔طلبہ نے ایکسپو کو ایک معلوماتی، متاثر کن اور کیریئر ساز تجربہ قرار دیا۔ ان کا کہنا تھا کہ ایسے پروگرامز نہ صرف ان کی تعلیمی سمت متعین کرتے ہیں بلکہ ان کی تخلیقی صلاحیتوں کو جلا بخشتے ہیں۔اختتامی تقریب کے مہمان خصوصی سینٹورس کے سی ای او سردار یاسر الیاس خان تھے۔
انہوں نے نوجوانوں کی صلاحیتوں کو سراہتے ہوئے کہا کہ ہمارے نوجوانوں میں بے پناہ صلاحیتیں موجود ہیں، ضرورت صرف انہیں درست سمت میں رہنمائی اور موزوں مواقع فراہم کرنے کی ہے تاکہ وہ اپنے خوابوں کو حقیقت میں بدل سکیں۔انہوں نے طلبہ کے سٹارٹ اپس اور بزنس آئیڈیاز کو سراہا اور کہا کہ پاکستان کا مستقبل انہی نوجوانوں کے ہاتھ میں ہے۔
آخر میں وائس چانسلر نے نوجوانوں پر زور دیا کہ درمیانی راستہ اختیار نہ کریں، تعلیم کے ساتھ ساتھ جدت، محنت اور خوداعتمادی کو اپنا شعار بنائیں اور اپنے آئیڈیاز کو عملی شکل دے کر ملک کی ترقی میں اپنا کردار ادا کریں۔تقریب کے اختتام پر شرکا، سٹالز لگانے والے اداروں اور پارٹنر آرگنائزیشنز کو اعزازی اسناد اور شیلڈز پیش کی گئیں۔
Short Link: https://urdu.app.com.pk/urdu/?p=582944
