اسلام آباد۔22اپریل (اے پی پی):اسلامی تعاون تنظیم (او آئی سی) کی سٹیئرنگ کمیٹی کا چھٹا دو روزہ اجلاس منگل کو یہاں کامسٹیک سیکرٹریٹ میں شروع ہوگیا۔سٹیئرینگ کمیٹی کے اجلاس میں او آئی سی ایس ٹی آئی ایجنڈا 2026 کے نفاذ پر پیش رفت کا جائزہ لیا گیا۔ اجلاس میں 15 او آئی سی اداروں کے نمائندگان شرکت کررہے ہیں ۔ اجلاس میں اسلامی تعاون تنظیم کے اسسٹنٹ سیکرٹری جنرل آفتاب احمد کھوکھر بھی شرکت کررہے ہیں۔
کو آرڈینیٹر جنرل کامسٹیک پروفیسر ڈاکٹر ایم اقبال چوہدری نے اجلاس کے شرکاء کا خیر مقدم کرتے ہوئے کہا کہ سٹیئرنگ کمیٹی کے اجلاس کا انعقاد کامسٹیک اور پاکستان کے لیے اعزاز ہے۔ اس موقع پر شرکاءنے کہا کہ او آئی سی ایس ٹی آئی ایجنڈا تحقیق و ٹیکنالوجی میں تعاون کا مظہر ہے۔ انہوں نے کہا کہ کامسٹیک، او آئی سی میں سائنس و ٹیکنالوجی تعاون میں مرکزی کردار ادا کررہا ہے۔
او آئی سی سٹیئرنگ کمیٹی کے اجلاس میں شرکاءنے علم کے تبادلے اور پائیدار ترقی پر زور دیا۔ اسسٹنٹ سیکرٹری جنرل او آئی سی نے کہا کہ سائنس و ٹیکنالوجی اور جدت ایجنڈا 2026 پر تبادلہ خیال کرنا وقت کی ضرورت ہے۔ اجلاس میں مستقبل کی حکمت عملی اور 2026 کے بعد کے اقدامات پر مشاورت کی گئی اور ابو ظہبی اعلامیہ 2022 کے تحت اداروں کی پیش رفت پر بریفنگ دی گئی۔
Short Link: https://urdu.app.com.pk/urdu/?p=585723
