اسلام آباد۔22اپریل (اے پی پی):وفاقی وزیر خزانہ و محصولات سینیٹر محمد اورنگزیب نے کہاہے کہ پاکستان امریکا کے ساتھ بڑے پیمانے پر معاشی روابط کو فروغ دینے کاخواہش مندہے، پاکستان میں امریکی فرموں کی سرمایہ کاری کو خوش آمدید کہیں گے۔ انہوں نے یہ بات عالمی جریدے بلوم برگ کو انٹرویودیتے ہوئے کہی۔ وزیر خزانہ نے کہاکہ امریکا کے ساتھ معاشی اورتجارتی روابط کوفروغ دینا چاہتے ہیں اوراس حوالہ سے ہم تعمیری انداز میں آگے بڑھیں گے، جلد ہی ایک سرکاری وفد امریکہ کا دورہ کرے گا۔
وزیر خزانہ نے کہاکہ پاکستان امریکہ سے مزید کپاس اور سویا بین خریدنے کا خواہش مند ہے، غیر ٹیرف رکاوٹوں کو ختم کرنے پر بھی بات چیت جاری ہے تاکہ امریکی مصنوعات کے لیے پاکستانی منڈیوں کے دروازے کھل سکیں۔ انہوں نے کہاکہ امریکی مصنوعات پر پاکستان میں کوئی غیر ضروری جانچ پڑتال یا رکاوٹیں ہیں تو اس کا جائزہ لینے کو تیار ہیں، ہم پاکستان میں امریکی فرموں کی سرمایہ کاری کو خوش آمدید کہیں گے اورخصوصی طور پر کان کنی اور معدنیات کے نئے شعبوں میں امریکی سرمایہ کاری کی حوصلہ افزائی کریں گے۔
وزیر خزانہ نے کہاکہ پاکستان کی حکومت معیشت کو پائیدار ترقی کی راہ پر ڈالنے کیلئے اقدامات کررہی ہے،ترقی کے سفر میں سرمائے کے حصول کے لیے عالمی مالیاتی منڈیوں سے رجوع کریں گے، ملک کو معاشی اتار چڑھائو کے چکر سے نکالناہمارا نصب العین ہے، حکومت پاکستان کو مستحکم ترقی کے سفر پر گامزن کرنے کے لیے پرعزم ہے۔وزیر خزانہ نے کہاکہ پاکستان بین الاقوامی کیپٹل مارکیٹوں سے استفادہ کرنے کیلئے بھی اقدامات کررہاہے، پاکستان رواں سال 200سے لیکر250ملین ڈالرمالیت کے پہلے پانڈابانڈز جاری کرے گا۔
Short Link: https://urdu.app.com.pk/urdu/?p=585904
