انقرہ۔22اپریل (اے پی پی):ترکیہ کے صدر رجب طیب ایردوان کی دعوت پر وزیراعظم محمد شہباز شریف ترکیہ کے دو روزہ دورے پر انقرہ پہنچ گئے۔انقرہ کے ہوائی اڈے پر ترک وزیر دفاع یشار گیو لر ، ڈپٹی گورنر انقرہ ظفر اورحان، پاکستان ترکیہ کلچرل ایسوسی ایشن کے صدر برہان قایاترک پاکستان کے ترکیہ میں سفیر یوسف جنید، حکومت ترکیہ کے اعلیٰ حکام اور انقرہ میں تعینات پاکستانی سفارتکاروں نے ان کا استقبال کیا۔
منگل کو وزیراعظم آفس کے میڈیا ونگ سے جاری بیان کے مطابق وزیراعظم شہبازشریف ترک صدر رجب طیب ایردوان سے ملاقات کریں گے۔ دونوں رہنما دو طرفہ تعلقات کو مزید وسعت دینے سمیت اہم علاقائی وعالمی امور پر تبادلہ خیال کریں گے۔
دونوں رہنما مشترکہ پریس کانفرنس سے بھی خطاب کریں گے۔اپنے قیام کے دوران وزیر اعظم ترک سرمایہ کاروں اور کاروباری وفود سے بھی ملاقاتیں کریں گے ۔نائب وزیر اعظم اور وزیر خارجہ محمد اسحاق ڈار، وزیر اطلاعات ونشریات عطا ءاللہ تارڑ اور معان خصوصی طارق فاطمی بھی وزیر اعظم کے ہمراہ ہیں۔
Short Link: https://urdu.app.com.pk/urdu/?p=586028
