اسلام آباد۔23اپریل (اے پی پی):وزیراعظم یوتھ پروگرام کے چیئرمین رانا مشہود احمد خان نے پی ایم آفس میں نوجوان انفلوئنسرز سے ملاقات کی جس میں پروگرام کی ٹیم کے اراکین کے ساتھ ملک کے مختلف شہروں سے تقریباً 20 نوجوان انفلوئنسر زموجودتھے۔ اس موقع پربین الاقوامی جہت کا اضافہ کرتے ہوئے نائیجیریا کے ایک انفلوئنسر نے بھی شرکت کی،نوجوانوں کو بااختیار بنانے اور مشغولیت کے اقدامات پر توجہ مرکوز کرتے ہوئے سیشن انتہائی نتیجہ خیز رہا۔
بدھ کو وزیراعظم یوتھ پروگرام سے جاری بیان کے مطابق شرکت کرنے والوں میں فہد ملک، اریب اظہر، عینی قریشی، شاہ رخ خان، لامیہ خان، ندا، بسمہ نور، ابیولا اطوباتیلے، دانش زرنش، صہیب رفاقت، ارسلان منیر، سبطین زاہد، خواجہ اجلال، چاندنی عروج، عبدالرحمٰن،سدرہ علی نقوی اور مشعال شفیق شامل تھے۔ رانا مشہود احمد خان نے مہمانوں کا پرتپاک خیرمقدم کیا اور ای 4 پر روشنی ڈالی جو بامعنی اقدامات کے ذریعے نوجوانوں کو بااختیار بنانے کے گرد گھومتا ہے۔انہوں نے قومی رضاکار کور سمیت اہم اقدامات کے بارے میں ایک جامع بریفنگ دی جس کا مقصد پاکستان کے نوجوانوں کی بے پناہ غیر استعمال شدہ صلاحیتوں کو کھولنا ہے۔
انہوں نے ڈیجیٹل یوتھ ہب بھی متعارف کرایا جس کا آغاز 26 مارچ کو کیا گیا تھا، آغاز سے اب تک 10لاکھ 22ہزار420 نوجوانوں نے وزیراعظم یوتھ پروگرام کی ایپلیکیشن ڈائون لوڈ کی ہے۔ انہوں نے کہا کہ نوجوانوں کی شمولیت کے بعد تعلیم اگلی اہم ترجیح ہوگی۔ملاقات کے دوران جن اہم اقدامات پر تبادلہ خیال کیا گیا ان میں وزیراعظم یوتھ لون سکیم، آئیڈیاز اور انکیوبیشن سینٹرز کا قیام، ای سپورٹس کی ترقی اور 2028 کے اولمپکس میں شرکت کے لئے پاکستان کی سٹریٹجک منصوبہ بندی شامل تھی۔ یوتھ انفلوئنسرز کو اپنے پلیٹ فارمز کو ذمہ داری کے ساتھ استعمال کرنے کی اس پیغام کے ساتھ ترغیب دی گئی کہ آپ نوجوانوں کی آواز ہیں ، لوگ آپ کو سنتے ہیں، نوجوانوں میں امید اور مثبت پیغام پہنچائیں۔
انہوں نے اجتماعی ذمہ داری پر زور دیا اور تعمیری تنقید کا خیرمقدم کیا۔اس موقع پر شرکا نے قیمتی آرا کا اشتراک کیا۔ انہوں نے حکومت پر زور دیا کہ وہ مختلف میڈیا چینلز کے ذریعے مقامی اور عالمی سطح پر پاکستان کے مثبت تشخص کو فروغ دے۔شرکا نے یوتھ افیئرز ونگ کے مکالمے اور شمولیتی نقطہ نظر کی بھی تعریف کی اور اسے نوجوانوں کی حقیقی شمولیت کی طرف اہم قدم قرار دیا۔
Short Link: https://urdu.app.com.pk/urdu/?p=586466
