اسلام آباد۔24اپریل (اے پی پی):وفاقی وزیرخزانہ ومحصولات سینیٹرمحمداورنگزیب نے کہاہے کہ کریڈٹ ریٹنگ کی بین الاقوامی ایجنسی فچ کی جانب سے پاکستان کی کریڈٹ ریٹنگ میں بہتری حکومت کے اصلاحاتی ایجنڈے پر عالمی اعتماد کا مظہر ہے، زراعت، آئی ٹی اور معدنیات وکان کنی کے شعبہ جات ترقی کا محور ہے، عالمی تجارتی تقسیم کے تناظر میں علاقائی تجارتی راہداریاں اہمیت کی حامل ہیں۔ انہوں نے یہ بات آئی ایم ایف اورعالمی بینک کے موسم بہارکے اجلاس کے موقع پر آئی ایم ایف کی منیجنگ ڈائریکٹر کرسٹالینا جورجیوا کے ساتھ منعقدمیناپ وزرائے خزانہ و گورنرز کے اجلاس اور گیٹس فاؤنڈیشن کی صدر برائے گلوبل پالیسی اینڈ ایڈووکیسی گارگی گوش سے ملاقات میں کہی۔
وزیر خزانہ نے اعتراف کیا کہ فروری 2025 میں سعودی عرب میں منعقدہ الاُولی ا ایمرجنگ مارکیٹس کانفرنس کے بعد عالمی غیر یقینی صورتحال میں اضافہ ہوا ہے۔ انہوں نے ٹیکسیشن، توانائی، نجکاری، سرکاری اداروں کی اصلاحات اور حکومت کے حجم میں کمی کے حوالے سے ڈھانچہ جاتی اصلاحات پر زور دیا۔وزیرخزانہ نے فچ ریٹنگز کی جانب سے پاکستان کی کریڈٹ ریٹنگ میں بہتری کو حکومت کے اصلاحاتی ایجنڈے پر عالمی اعتماد کا مظہر قرار دیا، زراعت، آئی ٹی اور مائنز و منرلز کے شعبوں کو ترقی کا محور قرار دیتے ہوئے وزیر خزانہ نے عالمی تجارتی تقسیم کے تناظر میں علاقائی تجارتی راہداریوں کی اہمیت پر زور دیا۔
وزیر خزانہ نے پاکستان کے لیے عالمی بینک کے 10 سالہ کنٹری پارٹنرشپ فریم ورک میں موسمیاتی تبدیلی اور آبادی جیسے اہم مسائل پر توجہ مرکوز کرنے پر شکریہ ادا کیا۔ انہوں نے بتایاکہ کہ پاکستان نے آئی ایم ایف کے ساتھ ریزیلیئنس اینڈ سسٹین ایبلٹی فیسیلٹی کے تحت نئی معاونت کے لیے اسٹاف سطح کا معاہدہ کیا ہے تاکہ موسمیاتی اثرات سے نمٹنے اور معیشت کو پائیدار بنانے کے اقدامات کیے جا سکیں۔
انہوں نے ادارہ جاتی صلاحیت سازی کے لیے آئی ایم ایف سے تکنیکی معاونت حاصل کرنے میں دلچسپی ظاہر کی اور عالمی بینک کے نجی شعبے کے ذریعے روزگار کی فراہمی کے ایجنڈے کی حمایت کی۔ وزیر خزانہ نے سرمایہ کاری کے قابل اور بینکاری کے لائق منصوبے تشکیل دینے کی ضرورت پر بھی زور دیا۔دریں اثناء وزیر خزانہ نے گیٹس فاؤنڈیشن کی صدر برائے گلوبل پالیسی اینڈ ایڈووکیسی گارگی گوش سے ملاقات کی۔ وزیر خزانہ نے پاکستان میں پولیو کے خاتمے، زچہ و بچہ کی صحت و غذائیت، خاندانی منصوبہ بندی کی سہولیات، ویکسین کی ترسیل اور حفاظتی ٹیکہ جات کے شعبوں میں گیٹس فاؤنڈیشن کی معاونت کو سراہا۔
انہوں نے فیڈرل بورڈ آف ریونیو (ایف بی آر) میں ٹیکس نظام کی ڈیجیٹلائزیشن کے لیے فاؤنڈیشن کے تعاون کو بھی سراہا جس کا مقصد ایف بی آر کو ڈیجیٹل ٹیکس ایڈمنسٹریشن میں تبدیل کرنا ہے۔ ملاقات میں بُنا اور راست ادائیگی کے پلیٹ فارمز کے انضمام پر بھی تبادلہ خیال کیا گیا تاکہ علاقائی سطح پر ادائیگیوں کے نظام کو بہتر بنایا جا سکے۔
وزیر خزانہ نے پاکستان میں پولیو کے خاتمے کے لیے گیٹس فاؤنڈیشن سے اپنی معاونت جاری رکھنے کی درخواست کی اور انہیں 7 مئی 2025 کو پاکستان کے قومی ہیپاٹائٹس سی خاتمہ پروگرام کی آگاہی مہم کے سلسلے میں منعقدہ تقریب میں شرکت کی دعوت بھی دی۔
Short Link: https://urdu.app.com.pk/urdu/?p=586890
