سیالکوٹ۔24اپریل (اے پی پی):معروف ماہر امراض قلب و کارڈیوویسکیولر سرجن ڈاکٹر سہیل طفیل نے کہا کہ بعض بچوں میں گلے کی خرابی امراض قلب کا باعث بن رہی ہے اورمختلف بازاری اشیا سمیت پیکڈ فاسٹ و فروزن فوڈز، کھٹی، غیر معیاری گھی میں تلی ہوئی اشیا وغیرہ کے استعمال سے گلے خراب ہونے کے باعث بچوں میں امراض قلب کی شرح میں اضافہ ہو رہاہے ۔
اے پی پی سے بات چیت کے دوران انہوں نے کہاکہ گلے کی خرابی و انفیکشن اور رومینک فیور کو اکثر اوقات والدین یا میڈیکل افسران معمولی مرض سمجھتے ہیں لیکن بعض اوقات یہ بیماری معصوم بچوں کے دل کے والو خراب کرنے کا موجب بن رہی ہے جس سے نوبت سرجری تک بھی پہنچ سکتی ہے۔ انہوں نے کہاکہ والدین بچوں کے گلے خراب ہونے پر کسی غفلت کامظاہرہ نہ کریں اور بچوں کو فوری مستند ڈاکٹرز سے چیک کروایا جائے۔
انہوں نے کہاکہ بچوں کو بازاری چٹ پٹی، کھٹی، مصالحے دار، رنگین، پیک شدہ اشیا کھانے کو دینے سے گریز کرناچاہئے نیز تلی ہوئی، زیادہ ٹھنڈی یا بازاری آئس کریمیں، غیر معیاری مشروبات بھی بچوں کیلئے زہر قاتل ہیں اسلئے والدین اپنے بچوں کو سختی سے ایسی اشیا کے استعمال سے روکیں۔ انہوں نے کہاکہ دل کی بیماریوں سے بچاؤ کیلئے پرہیز و پیشگی تدارکی اقدامات انسان کو دل کے عارضہ اور بڑی پریشانیوں سے بچا سکتے ہیں۔
Short Link: https://urdu.app.com.pk/urdu/?p=587010
