لاہور۔26اپریل (اے پی پی):وزیراعلی مریم نوازشریف نے ایئر پنجاب پراجیکٹ کی منظوری دیدی-فضا میں بلند پرواز،زمین پر تیز ترین رفتارپاکستان کی پہلی صوبائی ایئر لائن اور پاکستان کی پہلی بلٹ ٹرین کا آغاز کیا جا رہاہے،پنجاب پہلی صوبائی ایئر لائن ایئر پنجاب اور پہلی بلٹ ٹرین چلانے کیلئے تیارہے،پہلی صوبائی ایئر لائن ایئر پنجاب کاپراجیکٹ خصوصی اجلاس میں پیش کر دیا گیا۔
وزیراعلی مریم نوازشریف نے ایئر پنجاب پراجیکٹ کی منظوری دیدی،لاہور سے راولپنڈی بلٹ ٹرین پراجیکٹ کی اصولی منظوری بھی دے دی گئی۔اجلاس میں ایئرپنجاب کے لئے فوری طور پر چار ا یئر بس لیز پر لینے کا فیصلہ کیا گیا،ابتدائی طورپر ایئر پنجاب اندرون ملک ڈومیسٹک پروازیں شروع کرے گی،ایک سال کاپیریڈ مکمل ہونے کے بعد ایئرپنجاب بیرون ملک پروازیں بھی شروع کر سکے گی،ایئر پنجاب کیلئے جدید ترین طیارے لیز پر لینے کیلئے فوری انتظامات کا حکم دیا گیاہے جبکہ ایئر پنجاب کو ملک کی بہترین ایئر لائن بنانے کیلئے ضروری انتظامات کی ہدایت کی گئی ہے۔
اجلاس میں لاہور سے راولپنڈی تک پہلی بلٹ ٹرین کے پراجیکٹ پر تفصیلی بریفنگ دی گئی،بلٹ ٹرین کے ذریعے لاہور سے راولپنڈی کے سفر کا دورانیہ تقریبا اڑھائی گھنٹے تک رہ جائے گا۔اجلاس میں پاکستان ریلوے کے اشتراک سے تیز ترین بلٹ ٹرین چلانے کے لئے مختلف آپشنز کا بھی جائزہ لیا گیا۔ سینئر صوبائی وزیر مریم اورنگزیب کو پاکستان ریلوے سے اشتراک کار کا ٹاسک سونپ دیا گیا۔اجلاس کو بتایا گیا کہ بلٹ ٹرین پراجیکٹ کیلئے پبلک پرائیویٹ پارٹنر شپ کے آپشن پر بھی غورکیا جا رہاہے۔
وزیر اعلی پنجاب نے ،پاکستان کی پہلی بلٹ ٹرین پراجیکٹ کے آغاز کیلئے اقدامات مکمل کرنے کی ہدایت کی-وزیراعلی مریم نوازشریف کی زیر صدارت اجلاس میں پنجاب کے مزید چھ روٹس پر ہائی سپیڈ ٹرین کے لئے پلان طلب کر لیا گیا،لاہور سے شاہدرہ اور نارووال جبکہ لاہور سے رائیونڈ، قصور اور پاکپتن سے لودھراں تک ہائی سپیڈ ٹرین چلے گی۔
اجلاس کو بتایا گیا کہ قلعہ شیخوپورہ، جڑانوالہ سے شور کوٹ تک ہائی سپیڈ ٹرین کا روٹ ہوگا،ہائی سپیڈ ٹرین شور کوٹ سے جھنگ اوروہاں سے سرگودھا کیلئے چلائی جائے گی جبکہ یہ ٹرین لالہ موسی سے سرگودھا براستہ ملکوال بھی چلائی جائے گی نیز فیصل آباد سے چک جھمرہ اور شاہین آباد تک ہائی سپیڈ ٹرین کا روٹ ہوگا۔وزیراعلی مریم نوازشریف کی زیر صدارت اجلاس میں لاہور ییلو لائن اور ماس ٹرانزٹ لائن گوجرانوالہ پراجیکٹ کا بھی جائزہ لیا گیا۔
اجلاس کے دوران وزیر اعلی نے جناح ٹرمینل ٹھوکر نیاز بیگ تا ہربنس پورہ ییلو لائن پراجیکٹ سٹڈی 30مئی تک مکمل کرنے کی ہدایت کی جبکہ گوجرانوالہ ماس ٹرانزٹ لائن کی پراجیکٹ سٹڈی کیلئے 15جون کی ڈیڈ لائن مقررکردی گئی۔اجلاس میں ای ۔ٹیکسی پراجیکٹ کے بارے میں بھی تفصیلی بریفنگ بھی دی گئی۔
Short Link: https://urdu.app.com.pk/urdu/?p=588349
