مظفر آباد۔ 27 اپریل (اے پی پی):وزیراعظم آزادحکومت ریاست جموں و کشمیر چوہدری انوارالحق نے کہا ہے کہ بھارت کی جانب سے سفارتی محاذ کو طول دینے کا مقصد آبی جارحیت کا آغاز کرنا تھا ، کل بھی بھارت نے 40 ہزار کیوسک کا ریلا دریائے جہلم میں چھوڑ دیا لیکن آزاد کشمیر حکومت اور ہمارا انفراسٹرکچر اس کے لیے تیار تھے ، ہم مکمل طور پر تیار تھے اس وجہ سے کوئی جانی یا مالی نقصان نہیں ہوا۔ ان خیالات کا اظہار وزیراعظم آزاد کشمیر چوہدری انوار الحق نے نجی چینل کے پروگرام میں گفتگو کرتے ہوئے کیا۔
انہوں نے کہا کہ ہمارا موقف واضح ہے کہ دشمن نے اگر جارحیت کی تو ہم بھرپور جواب کے لئے تیار ہیں ، بھارت ہمیشہ سے پاکستان مخالف بیانیہ کیش کرواتا آیا ہے ، ماضی میں بھی فالس فلیگ آپریشنز کے ذریعے مودی حکومت نے بھرپور فائدہ اٹھایا ہے ۔ وزیراعظم آزادکشمیر نے کہا کہ بھارت کی مختلف ریاستوں جیسا کہ ناگا لینڈ ، منی پور ، آسام اور دیگر میں اندرونی خلفشار بڑھتا جارہا ہے۔ بھارت میں عیسائیوں کے چرچ جلائے گئے ہیں ، وہاں اقلیتوں پر زمین تنگ کی جارہی ہے ۔
انہوں نے کہا کہ بھارت 9 لاکھ فوج رکھ کر بھی مقبوضہ کشمیر میں لوگوں کے دل فتح کرنے میں بری طرح ناکام ہوا ہے تو پھر ان کی ساری فوجی طاقت کا کیا فائدہ ہے ؟ وزیراعظم آزاد کشمیر نے کہا کہ ہندوتوا فلاسفی یا چانکیا ڈاکٹرائن جیسے انتہاپسندانہ نظریات کو زندہ رکھنے کی شرط اول اور آخر فالس فلیگ آپریشنز ہی ہیں ، ان نظریات کی بنیاد جھوٹ اور فراڈ پر ہے ۔ انہوں نے کہا کہ ہندوستان کو سفارتی محاذ کا جواب سفارتی سطح پر دیا جائے گا ۔
Short Link: https://urdu.app.com.pk/urdu/?p=588563
