کراچی۔ 29 اپریل (اے پی پی):کراچی پورٹ ٹرسٹ کے پورٹ فائر ڈیپارٹمنٹ نے آئل پیئر 2 کے مقام پر فائر فائٹنگ ڈرل کا کامیاب عملی مظاہرہ کیا۔ وفاقی وزیر برائے بحری امور محمد جنید انوار بھی اس موقعے پر موجود تھے،انہوں نے یہ کارروائی دلچسپی سے دیکھی اورعملے کی پیشہ ورانہ صلاحیت، مستعدی اور استعداد کو سراہا۔ فائر ڈرل کے دوران عمارت میں لگی آگ کو بجھانے ، آگ میں گھرے لوگوں کو ریسکیو کرنے اور حساس دستاویزات اور سامان کی بحفاظت منتقلی کا عملی مظاہرہ دکھایا گیا۔
اس موقع پر وزیر بحری امور کو پورٹ فائر آفیسر نے بتایا کہ کے پی ٹی کے پورٹ فائر ڈیپارٹمنٹ نے ہمیشہ پورٹ کی ذمہ داریوں کے علاوہ مقامی حکومت کو بھی شہر کراچی میں حادثاتی آگ بجھانے کے سلسلے میں مدد فراہم کی اور ہمیشہ سب سے پہلے پہنچ کر آگ بجھانے میں کردار ادا کیا ۔ وفاقی وزیر جنید انوار نے کے پی ٹی کی کاوشوں کو سراہا اور ان ایس او پیز کو مزید بہتر بنانے کے لئے چند مفید تجاویز بھی دیں ۔
Short Link: https://urdu.app.com.pk/urdu/?p=589453
