حیدرآباد۔ 30 اپریل (اے پی پی):ڈپٹی انسپکٹر جنرل آف پولیس حیدرآباد رینج طارق رازق دھاریجو نے یکم مئی (لیبر ڈے)کے موقع پر سکیورٹی انتظامات بہتر بنانے کی ہدایات جاری کرتے ہوئے کہا کہ لیبر ڈے کی مناسبت سے منعقدہ تقاریب و ریلیوں کے مقامات پر عوام کے جان و مال کے تحفظ کو ہر صورت یقینی بنانے کے لیے تمام وسائل بروئے کار لائے جائیں۔
ڈی آئی جی پی طارق رازق دھاریجو نے ہدایت کی کہ شاپنگ سینٹرز، ملکی و غیر ملکی ریستوران، اہم سرکاری و نیم سرکاری دفاتر، عمارتوں، حساس تنصیبات، مساجد، امام بارگاہوں، مزارات، اقلیتی برادری کی عبادت گاہوں اور رہائشی کالونیوں پر حفاظتی اقدامات کو پولیس کنٹی جنسی پلان کے تحت یقینی بنایا جائے۔ حیدرآباد رینج کے تمام ایس ایس پیز بذات خود حفاظتی انتظامات کی نگرانی کریں اور ایس ڈی پی اوز و ایس ایچ اوز کو علاقوں میں پٹرولنگ، رینڈم سنیپ چیکنگ، پکٹنگ اور ایڈوانس انٹیلی جنس کلیکشن کو مضبوط بنانے کی ہدایت دی گئی ہے۔ شرپسند و سماج دشمن عناصر پر کڑی نظر رکھنے کے لئے سادہ لباس میں ملبوس پولیس اہلکاروں کی تعیناتی کا خاطر خواہ بندوبست کیا جائے۔
ڈی آئی جی پی طارق رازق دھاریجو نے کہا کہ پولیس عوام کے جان و مال کے تحفظ جیسے بنیادی فریضے کو انتہائی جانفشانی، ایمانداری، محنت، لگن اور پیشہ ورانہ تقاضوں کے عین مطابق سرانجام دے اور حیدرآباد رینج کے عوام کو پر امن ماحول فراہم کرے۔ مزید برآں، لیبر ڈے کے حوالے سے نکالی جانے والی ریلیوں اور اجتماعات کی لمحہ بہ لمحہ نگرانی کے لیے جدید سہولیات سے آراستہ کنٹرول روم کے قیام کی ہدایت بھی جاری کی گئی ہے۔
Short Link: https://urdu.app.com.pk/urdu/?p=590321
