ابوظہبی ۔2مئی (اے پی پی):وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے ابوظہبی میں “ڈیپارٹمنٹ آف گورنمنٹ اینیبلمنٹ (ڈی جی ای) ” کا سرکاری دورہ کیا جہاں انہوں نے چیئرمین احمد تمیم ہشام الکتاب سے ملاقات کی۔ ملاقات میں متحدہ عرب امارات کے تجربات سے سیکھنے پر تبادلہ خیال کیا گیا، خاص طور پر مصنوعی ذہانت، بگ ڈیٹا اور ڈیجیٹل ٹیکنالوجی کو بروئے کار لا کر طرز حکمرانی کی جدت، عوامی خدمات کی بہتری اور پائیدار اقتصادی ترقی کے فروغ پر گفتگو ہوئی۔ متحدہ عرب امارات سے ٹیکنالوجی کے استعمال میں تبدیلی کے حوالے سے تبادلہ خیال کیا گیا اور اُڑان پاکستان پیش کیا گیا۔ دونوں فریقین نے ٹیکنالوجی کے تبادلے پر اتفاق کیا اور یہ بھی دیکھا کہ کس طرح متحدہ عرب امارات پاکستان کی مدد کر سکتا ہے۔
پاکستان کو جدید خطوط پر استوار کرنے میں حمایت کا اظہار کیا گیا اور وزیرِ منصوبہ بندی نے اس مقصد کے لیے سنجیدہ اقدامات کا اعادہ کیا۔ متحدہ عرب امارات کے عالمی تجربات سے سیکھنے کے لیے اقدامات کیے جا رہے ہیں تاکہ پاکستان کو جدید دنیا کے ہم پلہ بنایا جا سکے۔ پاکستان اور متحدہ عرب امارات نے پبلک سیکٹر میں ٹیکنالوجی پریکٹسز کے اشتراک پر اتفاق کیا۔
پروفیسر احسن اقبال نے ڈیجیٹلایزیشن کے نئے رجحانات اور حکومتی اداروں میں جدت کے فروغ میں متحدہ عرب امارات کی بصیرت افروز قیادت کو خراج تحسین پیش کیا اور “TAMM” جیسے اہم ڈیجیٹل پلیٹ فارمز کو سراہا، جنہوں نے حکومت اور شہریوں کے درمیان رابطے کو آسان، مؤثر اور شفاف بنایا۔ انہوں نے پاکستان کے فلیگ شپ پروگرام اُڑان پاکستان کا حوالہ دیا، جو 2047 تک پاکستان کو مختلف سیکٹرز کو جدید دنیا سے ہم آہنگ کرتے ہوئے عالمی مسابقت میں ممتاز مقام دلانے اور علم پر مبنی معیشت کے قیام کا بنیادی روڈمیپ فراہم کرتا ہے۔
اس دوران انہوں نے ای گورننس، مستند ڈیٹا پر مبنی فیصلہ و پالیسی سازی اور خدمت عامہ کے ماڈلز کی اہمیت اور پاکستان میں ان کو اپنانے کی حکمت عملی سے آگاہ کیا۔ احسن اقبال نے اس عزم کا اعادہ کیا کہ حکومت پاکستان حکومتی شعبے میں جامع اصلاحات، ڈیجیٹل طرز حکمرانی اور سمارٹ ٹیکنالوجیز اپنانے پر خصوصی توجہ دے رہی ہے۔ انہوں نے DGE کے ساتھ تعاون اور اشتراک عمل میں دلچسپی کا اظہار کیا۔
اس حوالے سے سول سروس کے شعبے کی استعداد کار میں اضافہ، پالیسی سازی کے لیے مصنوعی ذہانت پر مبنی ٹولز، عوامی لین دین میں بلاک چین ٹیکنالوجی اور ادارہ جاتی ہم آہنگی کے ڈھانچے کو فروغ دینے کے حوالے سے خصوصی تبادلہ خیال کیا گیا۔ ملاقات کے دوران دونوں ممالک کے درمیان علم و تجربے کے تبادلے، استعداد کار میں اضافے اور نئی ٹیکنالوجیز کو حکومتی نظام میں متعارف کرانے کے لیے پائلٹ منصوبوں پر مشترکہ تعاون کے امکانات کا رسمی جائزہ لینے پر اتفاق کیا گیا۔
پروفیسر احسن اقبال نے متحدہ عرب امارات کے ماہرین کو پاکستان کے منصوبہ بندی کمیشن اور دیگر متعلقہ اداروں کے ساتھ اشتراک کی دعوت دی تاکہ ایسے مشترکہ منصوبے تشکیل دیے جا سکیں جو پائیدار ترقیاتی اہداف ،عوامی شعبے میں جدت اور اُڑان پاکستان کے اہداف سے ہم آہنگ ہوں۔
Short Link: https://urdu.app.com.pk/urdu/?p=591598
