اسلام آباد۔7مئی (اے پی پی):نائب وزیراعظم اور وزیر خارجہ سینیٹر محمد اسحاق ڈار نے اسلام آباد میں مقیم سفیروں کو 6 اور 7 مئی کی درمیانی رات کو پاکستان اور آزاد جموں و کشمیر میں بھارتی حملوں پر بریفنگ دی۔
دفتر خارجہ کے مطابق نائب وزیراعظم نے بھارتی جارحیت کی شدید مذمت کی جس نے نہ صرف پاکستان کی خودمختاری کی خلاف ورزی کی بلکہ علاقائی امن و استحکام کو بھی خطرے میں ڈالا۔ انہوں نے کہا کہ بھارت نے یہ اقدامات اقوام متحدہ کے چارٹر، بین الاقوامی قانون اور بین ریاستی تعلقات کو کنٹرول کرنے والے اصولوں کی صریح خلاف ورزی کرتے ہوئے کئے۔
انہوں نے دہشت گردوں کے بنیادی ڈھانچے کو نشانہ بنانے کے بے بنیاد بھارتی دعوئوں کو مسترد کر دیا۔ انہوں نے کہا کہ پہلگام حملے سے پاکستان کو جوڑنے کا کوئی قابل اعتبار ثبوت نہیں ہے۔ نائب وزیراعظم اور وزیر خارجہ نے کہا کہ بھارتی قیادت نے ایک بار پھر دہشت گردی کا استعمال کرتے ہوئے مظلومیت کی فرضی داستان کا سہارا لیا۔
انہوں نے اس بات پر افسوس کا اظہار کیا کہ بھارت نے کشیدگی میں کمی اور تحمل سے کام لینے کے لیے بین الاقوامی برادری کے بار بار مطالبے پر توجہ نہیں دی۔ انہوں نے عالمی برادری پر زور دیا کہ وہ بھارت کو اس کے غیر ذمہ دارانہ اور لاپرواہ طرز عمل کے لیے جوابدہ ٹھہرائے۔
Short Link: https://urdu.app.com.pk/urdu/?p=594084
