اسلام آباد۔13مئی (اے پی پی):وفاقی وزیر اطلاعات و نشریات عطاء اللہ تارڑ نے کہا ہے کہ پاکستان اور بھارت کے درمیان جنگ بندی مختلف ممالک کی موثر سفارتی کوششوں کا نتیجہ ہے۔ سکائی نیوز کو دیئے گئے انٹرویو میں وفاقی وزیر اطلاعات نے کہا کہ وزیراعظم پاکستان نے امریکی صدر ڈونلڈ ٹرمپ کا خصوصی شکریہ ادا کیا ہے جنہوں نے کشیدگی کم کرانے کے لئے کلیدی کردار ادا کیا۔
انہوں نے کہا کہ چین، سعودی عرب، متحدہ عرب امارات، ترکیہ اور قطر نے بھی پاکستان اور بھارت کے درمیان جنگ بندی کے لئے اہم سفارتی کردار ادا کیا۔ ایک سوال پر وفاقی وزیر اطلاعات نے کہا کہ امریکی صدر کی جانب سے جاری کردہ دوسری ٹویٹ میں مسئلہ کشمیر کے حل کے لئے امریکی خواہش کا واضح اظہار کیا گیا ہے۔ صدر ڈونلڈ ٹرمپ مسئلہ کشمیر کے حل کے خواہاں ہیں۔
ایک اور سوال کا جواب دیتے ہوئے وفاقی وزیر اطلاعات نے کہا کہ بھارت نے پاکستان کو پانی کی فراہمی تاحال بند نہیں کی اور اس وقت پانی کی فراہمی معمول کے مطابق جاری ہے۔ ان کا کہنا تھا کہ بھارت کے پاس پانی روکنے کی تکنیکی صلاحیت نہیں ہے۔ پہلگام واقعہ کے سوال میں وفاقی وزیر اطلاعات نے کہا کہ پاکستان نے اس افسوسناک واقعہ پر دکھ اور ہمدردی کا اظہار کیا اور شفاف تحقیقات میں تعاون کی پیشکش کی تاہم بھارت نے بغیر کسی ثبوت کے پاکستان پر الزامات عائد کئے۔ انہوں نے کہاکہ اب تک بھارت ایک بھی ثبوت پیش نہیں کر سکا اور نہ ہی کسی گروہ نے اس واقعہ کی ذمہ داری قبول کی ہے۔
عطاء اللہ تارڑ نے مزید کہا کہ مقبوضہ کشمیر میں7 لاکھ بھارتی فوج کی موجودگی میں پہلگام جیسے واقعہ کا پیش آنا بھارتی سیکورٹی اور انٹیلی جنس کی بدترین ناکامی ہے اور بھارت اس واقعہ کو پاکستان سے جوڑنے کی کوشش میں بری طرح ناکام ہوا ہے۔ وفاقی وزیر اطلاعات نے کہا کہ جنگ بندی کے بعد پاکستان اور بھارت کے ڈی جی ایم اوز کے درمیان پہلا رابطہ ہو چکا ہے۔ ایک سوال کے جواب میں وفاقی وزیر اطلاعات نے کہا کہ پاکستان دہشت گردی کے خلاف سب سے بڑی جنگ لڑ رہا ہے اور مغربی سرحدوں پر دہشتگردوں کے خلاف موثر کارروائیاں جاری ہیں۔
پاکستان نے دہشت گردی کے خلاف جنگ میں بے گناہ شہریوں، جوانوں اور افسران کی جانوں کی قربانیاں دی ہیں۔ انہوں نے واضح کیا کہ پاکستان میں کسی دہشت گرد گروہ کی کوئی محفوظ پناہ گاہ موجود نہیں ہے ۔ ایک سوال کے جواب میں وزیر اطلاعات نے کہا کہ حالیہ جنگ بندی پاکستان کی کمزوری نہیں بلکہ اس کی حکمت عملی اور سفارت کاری کی کامیابی ہے۔
ہم نے بھارتی فوجی تنصیبات، اسلحہ ڈپوئوں اور عسکری مقامات کو نشانہ بنایا جبکہ بھارت کے نقصانات سب کے سامنے ہیں۔ انہوں نے کہا کہ بھارت مزید کشیدگی جھیلنے کی پوزیشن میں نہیں تھا۔ انہوں نے کہا کہ پوری قوم افواج پاکستان کے ساتھ کھڑی ہے، پاکستان کی فتح روز روشن کی طرح عیاں ہے۔
Short Link: https://urdu.app.com.pk/urdu/?p=596427
