کراچی ۔24مئی (اے پی پی):وفاقی وزیر اطلاعات و نشریات عطاء اللہ تارڑ نے ہفتہ کو یہاں مسلم لیگ (ن) کی دیرینہ، نظریاتی اور متحرک کارکن ثمینہ قاسم کی نماز جنازہ میں شرکت کی اور مرحومہ کو پارٹی کیلئے خدمات خراج عقیدت پیش کیا۔ وفاقی وزیر اطلاعات نے نماز جنازہ کے بعد مرحومہ کی قبر پر پھول نچھاور کئے۔ انہوں نے مرحومہ کے اہل خانہ، مسلم لیگ (ن) کے مقامی رہنمائوں اور کارکنوں سے بھی ملاقات کی اور مرحومہ کے ایصال ثواب کے لئے فاتحہ خوانی کی۔
اس موقع پر گفتگو کرتے ہوئے وفاقی وزیر اطلاعات نے کہا کہ ثمینہ قاسم مسلم لیگ (ن) کی ایک باوقار، نظریاتی اور متحرک کارکن تھیں۔ ثمینہ قاسم نے پارٹی کے لئے گراں قدر خدمات سرانجام دیں۔ انہوں نے کہا کہ مرحومہ ایک محب وطن پاکستانی تھیں، اپنے انتقال سے چند گھنٹے قبل بلوچستان کے ضلع خضدار میں سکول بس کے سانحہ پر بھی سوشل میڈیا پر افسوس کا اظہار کیا جو ان کی سماجی و قومی شعور اور ملک سے وابستگی کا واضح ثبوت ہے۔
انہوں نے کہا کہ ثمینہ قاسم کا انتقال پارٹی کے لئے بڑا نقصان ہے۔ ان کے انتقال سے پیدا ہونے والا خلاء کبھی پُر نہیں ہو سکے گا۔ وفاقی وزیر اطلاعات نے دعا کی کہ اللہ تعالیٰ مرحومہ کو اپنے جوار رحمت میں اعلیٰ مقام عطاء فرمائے اور لواحقین کو صبر جمیل دے۔
Short Link: https://urdu.app.com.pk/urdu/?p=600969
 کی دیرینہ کارکن ثمینہ قاسم کی نماز جنازہ میں شرکت، مرحومہ کو خراج عقیدت پیش کیا){kind=link}