اسلام آباد۔9جون (اے پی پی):ہائر ایجوکیشن کمیشن (ایچ ای سی) نے پاکستان میں اعلیٰ تعلیم کے مستقبل کو سنوارنے میں اپنا اہم کردار جاری رکھا ہے اور اس شعبے میں سٹرٹیجک اصلاحات اور ہدفی سرمایہ کاری کی ہے۔ 2002ء میں اپنے قیام کے بعد سے ایچ ای سی کا مقصد رسائی کو بڑھانا، معیار کو بہتر بنانا اور اعلیٰ تعلیم کو ملک کی ترقیاتی ضروریات کے ساتھ ہم آہنگ کرنا ہے۔ پیر کو جاری کیے گئے اقتصادی سروے 2024-25 کے مطابق داخلوں کی شرح میں اضافے میں پیش رفت کے باوجود پاکستان اب بھی عالمی معیارات سے پیچھے ہے،
مالی سال 2025 کے دوران اس فرق کو ختم کرنے کے لیے نئی کوششیں کی گئی ہیں۔ مالی سال 2025 کے جولائی اور مارچ کے درمیان ایچ ای سی نے پبلک سیکٹر ڈویلپمنٹ پروگرام (پی ایس ڈی پی) 2024-25 کے تحت وسیع پیمانے پر اقدامات کی قیادت کی جس کیلئے 61.12 بلین روپے مختص کئے گئے۔ یہ فنڈنگ پبلک سیکٹر یونیورسٹیوں میں159 ترقیاتی منصوبوں بشمول 138 جاری اور 21 نئے منصوبوں کیلئے ہے ۔
قابل ذکر بات یہ ہے کہ وزیر اعظم یوتھ لیپ ٹاپ سکیم کے فیز IV کے لیے 12 ارب روپے مختص کیے گئے ہیں جبکہ 9 ارب روپے خصوصی طور پر اس پروگرام کے لیے رکھے گئے ہیں۔ کلیدی منصوبوں میں نینو ٹیکنالوجی، کوانٹم کمپیوٹنگ، ایڈوانسڈ مینوفیکچرنگ، برانڈ ڈویلپمنٹ اور گروتھ سینٹر جیسے جدید شعبوں میں پانچ قومی مراکز کا قیام شامل ہے۔
دیگر اہم کوششوں میں وزیراعظم کی قومی رضاکار کور کا آغاز، نیشنل انسٹی ٹیوٹ آف انٹیلی جنس اینڈ سکیورٹی سٹڈیز (این آئی آئی ایس ایس) اور نیشنل سائبر سکیورٹی اکیڈمی (این سی ایس اے) کا قیام شامل ہے۔ قومی وژن "اڑان پاکستان” کے ساتھ ہم آہنگ ایچ ای سی انسانی سرمائے کی ترقی کو تیز کرنے اور اعلیٰ تعلیمی نظام میں آئی ٹی کے بنیادی ڈھانچے کو جدید بنانے پر توجہ مرکوز کر رہا ہے۔
اس میں طلباء کو 100,000 لیپ ٹاپس کی فراہمی اور ہائی ٹیک سلوشنز جیسے سنٹرلائزڈ ڈیٹا سینٹرز، ہائی پرفارمنس کمپیوٹنگ (ایچ پی سی)، یونیورسٹیوں کے لیے انٹرپرائز ریسورس پلاننگ (ای آر پی)، لرننگ مینجمنٹ سسٹمز (ایل ایم ایس) اور سمارٹ کیمپسز اور کلاس رومز کی تعیناتی شامل ہے۔
مزید برآں "ایکوئٹی اینڈ امپاورمنٹ” تھیم کے تحت ایچ ای سی نے بلوچستان، جنوبی پنجاب، اندرون سندھ، خیبرپختونخوا کے ضم شدہ علاقوں، آزاد جموں و کشمیر اور گلگت بلتستان جیسے محروم علاقوں میں رسائی کو بڑھانے اور معیار کو بہتر بنانے کو ترجیح دی ہے۔
اپریل 2025ء تک یونیورسٹی کے ترقیاتی منصوبوں کے لیے 32.6 بلین روپے پہلے ہی تقسیم کیے جا چکے ہیں، اس مالی سال میں 26 منصوبے مکمل ہونے والے ہیں اور 18 کیلئے پہلے ہی مکمل طور پر فنڈز فراہم کر چکے ہیں۔
