لاہور۔7جولائی (اے پی پی):پی آئی ٹی بی کےچیئرمین فیصل یوسف نے کہا ہے کہ پنجاب جاب سنٹر پر 13 لاکھ سے زائد افراد ملازمت کے حصول کیلئے رجسٹریشن کرا چکے ہیں۔انہوں نے کہا کہ پاکستان میں پہلی بار ضلعی سطح پر ملازمت کی تلاش میں معاونت فراہم کرنے کیلئے لیبر اینڈ ہیومن ریسورس ڈیپارٹمنٹ کیلئے پی آئی ٹی بی کے وضع کردہ آن لائن پلیٹ فارم پنجاب جاب سنٹر پر اگست 2022 سے اب تک 13 لاکھ سے زائد افراد بطور ملازمت کے متلاشی اپنی رجسٹریشن کروا چکے ہیں جبکہ ایک لاکھ 5 ہزار سے زائد افراد بطور آجر رجسٹرڈ ہیں۔ پورٹل کے قیام کا مقصد آجروں، پروموٹرز، ایمپلائمنٹ ایکسچینج ایجنسیوں
ورکرز اور ملازمت کے متلاشی افراد کو ایک پلیٹ فارم مہیا کرنا ہے تاکہ وہ ایک دوسرے کے ساتھ رابطہ قائم کر سکیں۔ اس حوالے سے پی آئی ٹی بی چیئرمین فیصل یوسف نے اپنے بیان میں کہا ہے کہ اس پلیٹ فارم کے ذریعے ہم یہ یقینی بنا رہے ہیں کہ باصلاحیت نوجوانوں کو ان کی قابلیت کے مطابق روزگار کے مساوی مواقع میسر آئیں اور آجروں کو بھی بااعتماد اور تربیت یافتہ افراد تک رسائی حاصل ہو۔ نجی اور سرکاری شعبے سے تعلق رکھنے والے افراد اور کاروباری مالکان پورٹل کے ذریعے آن لائن رجسٹر ہو سکتے ہیں، اس کے علاہ امیدوار موبائل فون سے 8900 پر اپنا قومی شناختی کارڈ نمبر بھیج کر یا واٹس اپپ نمبر 03108148900 پر میسج کر کے بھی رجسٹریشن لنک حاصل کر سکتے ہیں۔
