کراچی۔ 21 جولائی (اے پی پی):وزیراعلیٰ سندھ سید مراد علی شاہ سے متحدہ عرب امارات کے سفیر حماد عبید ابراہیم سالم الزابی نے ملاقات کی جس میں دوطرفہ تعلقات کو مضبوط بنانے اور سرمایہ کاری کے مواقع تلاش کرنے خصوصا ًپبلک پرائیویٹ پارٹنرشپ پر تبادلہ خیال کیا گیا۔
پیر کو وزیر اعلی ہائوس سے جاری اعلامیہ کے مطابق سفیر نے شاہراہِ بھٹو کی حالیہ تعمیر پر وزیراعلیٰ سندھ کو مبارکباد دی اور تصدیق کی کہ متحدہ عرب امارات کے سرمایہ کار جلد سندھ کا دورہ کریں گے تاکہ مختلف منصوبوں کا جائزہ لیا جا سکے۔
ملاقات میں دونوں رہنمائوں نے خواتین کو بااختیار بنانے کے لیے اقدامات پر تعاون کرنے پر بھی اتفاق کیا،جن کے تحت متحدہ عرب امارات سندھ میں خواتین کی صحت، روزگار اور تعلیم سے متعلق منصوبے شروع کرے گا۔ وزیراعلیٰ سندھ سید مراد علی شاہ نے اعلان کیا کہ متحدہ عرب امارات کی سرمایہ کاری سے متعلق ایک اہم اجلاس جلد بلایا جائے گا۔
