لاہور۔9اگست (اے پی پی):قومی احتساب بیورو (نیب) نے رواں سال کے پہلے چھ ماہ کی کارکردگی رپورٹ جاری کرتے ہوئے بدعنوانی کے خلاف اپنے پختہ عزم کا اعادہ کیا ہے، عوامی مفاد کے تحفظ اور لوٹی گئی قومی دولت کی بازیابی کے لیے اپنی کاوشوں کو مزید تقویت دینے کی کوشش جاری رکھی جائے گی، رواں سال کے پہلے 6 ماہ کے عرصے میں ادارے نے ریکارڈ ریکوریاں کی اور ہزاروں متاثرین کو ان کی رقوم واپس دلوائی ہیں۔
ترجمان کے مطابق نیب لاہور نے رواں سال کی دوسری سہ ماہی (اپریل تا جون)میں 456 ارب روپے کی ریکارڈ ریکوری کی ہے جبکہ جنوری سے جون تک چھ ماہ کے عرصہ میں مجموعی طور پر 547 ارب روپے کی ریکوری ممکن بنائی گئی۔ نیب نے اس دوران 532 ارب روپے مالیت کی منقولہ و غیر منقولہ جائیدادیں وفاقی و صوبائی وزارتوں، محکموں اور مالیاتی اداروں کے حوالے بھی کیں، علاوہ ازیں دھوکہ دہی کے مختلف مقدمات میں 12,611 متاثرین کو ان کی لوٹی ہوئی رقوم واپس دلوائی گئیں،اس دوران نیب کے علاقائی دفاتر نے شاندار کارکردگی کا مظاہرہ کیا جن کی تفصیلات کے مطابق نیب لاہور نے پاک عرب ہائوسنگ کیس میں 3 ارب 90 کروڑ مالیت کی 8 جائیدادیں ملزمان سے بازیاب کرائیں جنہیں فروخت کروا کر 2,500 متاثرین کو رقوم کی صورت میں تقسیم کیا جائے گا۔
اسی طرح نیب لاہور نے ایڈن کیس میں برآمد 3 ارب 20 کروڑ مالیت پر مشتمل پانچویں قسط کی رقم 11,880 متاثرین میں تقسیم کی۔ نیب راولپنڈی نے اسلام آباد کے سیکٹر 11-E میں واقع 29 ارب مالیت کی 51 کنال قیمتی سرکاری اراضی برآمد کروا کر متعلقہ رگولیٹر کیپیٹل ڈویلپمنٹ اتھارٹی کے حوالے کی، نیب راولپنڈی نے B4U نامی دھوکہ دہی کے بڑے مقدمے میں 3 ارب روپے کی رقم بازیاب کی جسے 17,214 متاثرین میں تقسیم کیا جائے گا۔
اسی طرح نیب سکھر نے نیشنل ہائی وے اتھارٹی کی 25 ارب روپے مالیت کی زمین اور سندھ کے محکمہ تعلیم و خواندگی کی 127 کنال و 15 مرلہ اراضی جس کی مالیت 895 ملین روپے ہے، بازیاب کرائی۔ ترجمان کے مطابق نیب نے بدعنوانی کے خاتمے اور قومی دولت کی بازیابی کے لیے اپنی کاوشیں جاری رکھنے کا عزم ظاہر کیا ہے تاکہ عوام کو انصاف فراہم کیا جا سکے اور ملک سے بدعنوانی کا خاتمہ ممکن ہو۔
